Ше хьехархо волчо-м дика кхетадергда хIанз аз дувцар, из кхетаде безам боацарашка ала дукха хургдар са тахан. Вай мехкарча цхьан ишколе, дукха ха йоацаш, хиннача хIамо чIоагIа тамаш яйтар сога. Дега дикка вас хинна яр 66 шерга кхаьча хьехархо, ший классе нийсденнача хIамах. Ца доагIача тайпара хьайзача 6-ча классе ягIача йиIига цо сабаре, хье мичахьа я кхетадеш хила, аьнна, хьехар деш къамаьл дича; йиIига нанас ишколан кулгалхо волча хьаена, ший йиIига хьалхашка бехказъяла, яхаш, къамаьл даьд 66 шу даьннача, ший вахарера 45 шу ишколе хьехаш, хьалкхувш латта тIехье нийсача наькъ тIа йоаккхаш Iодиллача, дуккхача яхьашка толамаш доахаш, дикагIа йола хьехархо лоархIаш, ший болх лакхача боараме лелабеш, бIаьха никъ бахьаш, хьайоагIача хьехархочунга. Майрра аргда аз, тхьовра хиннача ноаноех йолча кхалсага из хIама дергдацар; таханара, шоай беро фуннагIа дича а цхьацца бахьанаш лехаш, цар га доахаш; воккхагIал, зIамагIал яхача деша лерхIам царна ца бовзийтача, шоаш дер дика да мотташ, уж боабеш боахкача тахан баьннача ноаной гIулакх да из! ЦIа дизза хиннача тха дезала юкъера цхьа бер ишколера чудена хьехархочоа латкъа йиш йолаш хиннадац, вIалла дувцилга а дацар, хьехархо ва яхача сагах раьза воацаш дош алар.

«Фу йоах шуга цу хьехархочо, деша мара йоахий шуга цо?! Хьехархочо шо лоткъадеш цхьа дош оале, цу дийнахьа шоай гIулакх телхалга халаш», - яхаш, хьехархо массахана бакъволга; шоай даь, наьна санна цун сий де дезилга; эхь кхаба, эздел лораде дезилга хьалхадоахаш чакхбаьккхар оаха хIаране ишколера никъ. 66 шу даьннача хьехархочунга ший 6-ча классе дагIача бера хьалхашка бехказъяла яхача нанас малагIа яхь, эхь, Даьхенцара безам, воккхагIчунцара лерхIам лелабу тIехье кхеергья?! Ишттача хьехамца Iа кхевеча дезалхочо тахан цу хьехархочунца Iа леладайтар мара, кхоана хьайца а леладергдоацилга ховш хилалахь, аргдар аз цу наьнага! Вай къаман юкъе хьалха цIаккха а хинна хIамаш дац уж! Тхьоврарча, хьаькъалах бизза хиннача беркатеча ноаноша, хьехархочун юхь йоагаеш дош аьнначунга во хьал хургда шуга, яхаш, кхеяьй шоай тIехье.

Хьехархо яхача сагацара лерхIам боабарал ийрчагIа, харцахьа долаш фу хургда?!. Цу тайпарча ноаношка, даьшка аргдар аз, шоай дезала га доахаш, уж бухьебаха ца гIерташ, шоашта кхетам луш, вахаре нийса никъ харжа гIо деш латтача хьехархой сий де, цар хьаийца гIулакх мел лоархIаме да Iомабе уж, тIаккха кхеергья оаш беркате, сийдола тIехье. Из деррига юстардаьккхача, вайна ховш ма дий, тахан хьехархочун болх мел халача оттабаьб геттара дукха декхараш тIадехкаро. Хьалха хинначул халагIа ба цар болх тахан. Хьехархой дезале кхийнача аз сайна ховчара ду из къамаьл. ВоккхагIчун сий деш, цун юхь йоагаергйола дош ца оалаш хиларо вай къаманцара дуккха дика гIулакхаш кIал ца дуташ лоаттаду. Эздел яхар вай доадича, деррига харц, бух мелбенна лаьтта лард санна! Хийла шоай цIагIа шоашта доал де, цунга яхар дайта ца мога дезалхо хьехархоша нийсача новкъа хIана ваккхац, яхаш, безлуш хул цхьабараш… КIезига бац тахан вайна юкъе иштта нах. Кхетаде деза оаш, деррига а цIагIара дIадолалулга, наха юкъе цо гойтар ший цIенъюкъе Iомадаь хIама долга. Даьра, белгала-м хул хозача, сийдолча хьехам тIа кхеваь дезалхо ишколе а ишколера араваьлча а. Ишттачарна тIехьа оал из: «Дала сий долда хьо кхеваьча даь, наьна; цар дог деладеш хилва хьо». Ший уйла нийсъеш воацар, цIаккха а бокъонгахьа варгвац, из тешшаме да! Кхетаделаш, тахан ца кхетадой, кхоана тIехьа хургда шоана! Шоаш делхадергдоаца тIехье ураоттае доахке; эздел, эхь кхаба Iомаелаш из!