Дикагӏа дешараш котбаргба
Гӏалгӏай меттах йола яхьаш
Укх бетта 12-14 деношка Наьсарен кхале дӏахьош ба ишколай дешархошта юкъера наьна меттах, литературах, гӏалгӏай эзделах, къаман исторех йолча олимпиада моттигера бӏал. Цига дакъа лоацаш хургда Наьсарен кхален чуйоагӏача юрташкарча 7-11 классашка дешаш дагӏа бераш. Яхьаша къаьгга гойтаргда наьна мотт безаш, дег тӏара из къоабалбеш къахьегар малав, цунцара бувзам талмаста лелабер малав. Хьалхарча аргӏагӏа (маьтсела бетта 12 дийнахьа) наьна меттах дола къовсамаш хургда. Шо-шоай классашка хьежжа оттадаь хургда царна хаттараши тӏадаьхка декхараши, уж дувзаденна хургда лексикаца, орфографеца, морфологеца, метта кхыча лоархӏамеча доакъошца.
Литературах толам баккха ловчунна кӏоаргга йовза езаргья ше дешача классан программа, цунна чудоагӏа бе-беча жанрех дола йоазош, цхьадараш дагахьа ха дезаш моттигаш а нийсъяла тарлу. Иштта йоазонхой а цар вахарех-кхолламех дола хоамаш а да толамга водачунна довза дезараш. Цул совгӏа кицаш, жанрай башхалонаш, дешай маӏанаш, таржамаш де ховр тӏехвоалаш моттигаш нийсъеннай хьалхарча шерашка.
Хӏанзалца хиннача олимпиадашка хинна йоаца керда моттигаш юкъеенай укх шера дешархой яхьашта. Уж ювзаенна я гӏалгӏай культурацеи къаман исторецеи. Царех дола къовсамаш къаьсттача дийнахьа оттадаьд из кхетаче вӏашагӏъеллараша.
Олимпиада дӏаяхьара тӏахьожам лоаттабеш хургья дикагӏа волча 12 хьехархочох латташ йола кхел. Уж ба тайп-тайпарча юрташкарча ишколашка дуккхача шерашка наьна мотт, литература хьехарца белгалбаьнна нах.
Укх шера олимпиада дӏахьоргья Эккажкъонгий-Юртарча №7 йолча СОШ.
