Студентий тешаме новкъост хургдола китаб
«ГӀалгӀай мотт» яхача кердача Ӏилман балхах
Университета хьехархочун, филологически Ӏилмай кандидата, профессора ГӀоандалой Азай кердача книжках дувцале, эггара хьалха са белгалдаккха безам ба, со деша вагӀача хана, студенташта цу тайпара тешаме новкъост хургдола книжка дацар, аьнна. Укх шера вайцига арадаьннад Закречун Азай «ГӀалгӀай мотт» яха керда книжка. Из шозлагӀа арадоалаш дале а, цу тӀа дукха хувцамаш а кердадараш а да. Практически дешара лаьрхӀа да из. Цудухьа массадолча къамаьла даькъах, дешахьелхенех, фонетиках, орфографех йола параграфаш хинна ца Ӏеш, царца ювзаяь, хьаькъалца оттаяь упражненеш я. Цо аттача доаккхаргда студентий дешар, мотт а йоазув а шаьрдара, Ӏомадеш дола хӀама чӀоагӀдара даькъе. Цу 328 оагӀув йолча книжканна юкъеяхай 110 параграф, 310 упражнени. Цун рецензеш язъяьраш ба университета эрсий метта кафедра профессор, филологически Ӏилмай доктор Таринаькъан Л. У., гӀалгӀай метта кафедра доцент, филологически Ӏилмай кандидат Овшанаькъан Э. А.
Дувцаш долча книжкан юхьига юкъера цхьа дакъа оаш дийшача бакъахьа хетар сона: «Ер учебник яздаьд гӀалгӀай мотт Ӏомабеча лакхарча заведеней 1-ча курса студенташта лаьрхӀа. ЦхьоалагӀча курса студенташа укх пособеца кердайоаккхаргья школьни программа, кӀоаргагӀа Ӏомаергья.
Укх учебника тӀа лу гӀалгӀай меттах бола юкъара кхетам, гӀалгӀай меттах лаьца цхьадола керда хоамаш: лексиках, фонетиках, морфологех.
Дешара пособи оттадеча хана, лаьрххӀа уйла тӀаяхийтай халагӀеи аттагӀеи йола темаш къоастаяра, халагӀйолча темашта дукхагӀа теркам тӀабахийтаб, дукхагӀа практически материал еннай...
Упражненеш я, тӀехь-тӀехьагӀа халагӀа а мотт дикагӀеи кӀоаргагӀеи кхетабергболаш а. Упражненешка луш йола материал мотт шаьрбара чӀоагӀа гӀо дергдолаш я.
Укх учебникаца, 1-ча курсерча студенташа грамматика кердаяккхарал совгӀа, мотт а шаьрбергба, нийса язде а Ӏомалургба».
Книжка дика да, бакъда цхьа хӀама да цун во, дерригаш 500 мара дац арадаьннараш. Из дукхагӀа мел хул, гӀалгӀай мотт Ӏомабара дукхагӀа нах юкъеозаргбар цо. Белаглдаккха деза, книжка арадаьккхар ГӀалгӀай паччахьалкхен университет хилар.
