Къаьнара газеташ дешаш
ГIалгIай телевидене, радио хьалхара диктораш харжарах
Нохчийи гIалгIайи юкъара республика йолча хана, брригача мехка цIихеза диктораш бар телевидене а радио а гIалгIай меттала йола передачаш дIакхухьаш. Масала, телевидене геттара гIорбаьнна бар Янданаькъан Лидаи Малсаганаькъан Тамараи, тIехьагIо цига балха вера Ганенаькъан Мухьмад. Шолжа-ГIалий тIарча радио тайп-тайпарча ханашка вай къаман диктораш хиннабар Доданаькъан Iамар-Iаьла, Пхьилекъонгий Махьмад-СаIид, Угурчанаькъан Азматгири, Овшанаькъан Iалаудин, ГанукаевгIар (Ужахьанаькъан) Рая.
1992 шера гIалгIай къаьстта республика хьаяьчул тIехьагIа, хьахилар кердача мехка телевидени, радио. Юххьанца цар диктораш, цигарча хьакимаша шоаш хержа, оттабаьбар. Телевидене болх беш хилар Коазой Аслани Оскананаькъан Фатимаи. 1993 шера дIакхайкайир шиннахьа а диктораш хила безам болча наьха яхь. Укх шера нийсса 30 шу даьннад къаман вахаре из моттиг хинна. Цу хьакъехьа цу деношка (1993 шу, ардара бетта 23 ди) арадаьннача «Наьсарен оаз» яхача газето яздора: «31 заявлени хьачуеннаяр ГIалгIай телевиденеи радиони диктораш хила безам болча мехкарашеи кагийча нахеи. Яхьан кхо тур чакхъяьнначул тIехьагIа, дикагIбараш хьакъоастабаьб. Телевидене диктораш ба Эккажанаькъан Фатимаи Йовлой Илези. Фатима ашарий а хьехархочун а дешараш дийша я, Илез – юртбоахама техникум яьккха.
Радио диктораш хургба БIарахой Любаи Зангенаькъан Аслани.
Даькъалабувцаргба вай цар болх».
Иштта дIадоладелар вай къаман теле-радиокомпане дикторий вахар, цул тIехьагIа, укх 30 шера дукхаза хувцабеннаб уж. Хьалхара диктораш хинначар тахан кхыдола балхаш ду, Эккажанаькъан Фатима «ЦаI йола Росси» яхача вай республикерча отделене къахьегаш я, хIаьта Илез культуран министра заместитель ва.
