Керама Хасолта ваь хиннав 1922 шера ТIой-Юрта. Буро тIара ворхI шера деша школа яьккхачул тIехьагIа, И. Сталина цIерагIа тIема-форда авиаце училищен курсант хул цох. Моздакера училище цо чакхйоаккх 1941 шера.

1943 шера моастагIчунна духьалъотта, из вохаве дагахьа 63-зза гIеттай цун самолёт. Иттаза Бобруйско-Жлобинске оагIорахьа ваха вийзав цун. ХIаьта 53-зза Ковальски оагIорахьа дов деш хиннав.

1944 шера цунна лу ЦIеча Седкъан орден.

1945 шера февраль бетта 17 дийнахьа Хасолта Франкфурта йистошка эккхийт моастагIчун герзаш чудола склад. Из а кхыдола а деналера гIулакхаш бахьан долаш, цунна лу III-гIа лоархIам бола Сийлен орден. Цо дакъа лаьца хиннад Штаргад, Польцин, Кюстрин, Франкфурт яха шахьараш мукъайоахача а, Берлин йоаккхача а.

1945 шера май тIакхоачаш, из 160-зза ший тIема машенаца моастагIчох лета хиннав. Царех бархI дов дийнахьа даьд цо, 128 — бийсан, 24-зза моастагIчун низаш тохкаш хиннав. Цу хана шозлагIа лу цунна ЦIеча Седкъан орден.

1946 шера мара чакхбаьннабац цунна тIом, цу ханналца доазол арахьара мехкаш мукъадоахача дакъа лоацаш хиннав гIалгIай зIамига саг. Цунна деннача тIема совгIаташта юкъе я «Берлин яккхарах», «Германи эшаярах», «Варшава мукъаяккхарах» яха а кхыйола а мейдилгаш.

Уж деррига тIемаш деш, цхьа чов яь хиннаяц вай мехкахочоа. Оалаш ма хиллара, низ герз дукха хиларца бац, тIом бе харца ба. Уж дешаш ала мегаргда аьнна хет сона ТIой-Юртарча лётчиках. Къаьстта белгалдаккха лов, Советски Союза кхозза турпал хинна А. И. Покрышкин цун доттагIа хиннилга. Цул совгIа, «Дов де болх алхха къабеннараш» («В бой идут одни старики») яхача исбахьален фильма юкъе я Керама Хасолта моастагIашта таIазар дарца ювзаенна цхьа моттиг.

ТIом чакхбаьнначул тIехьагIа, майра лётчик вахаш а болх беш а ший даьй баьхача юрта хиннав. «Октябра 40 шу» яхача совхоза парторг вар из. Укхаза цунна деннача совгIаташта юкъе я «Сийлен белгало» яха орден, дукха мейдилгаш.

Кхелхав Керама Хасолта 1992 шера, ший нийсса 70 шу дизача хана.