Бийкар тӀеххьара гургал
Ийс шера деша школа яьккхар 34 сага
![](http://serdalo.ru/storage/fZyzSAfEYv4K6oD75KLz0ko1usrWFfEQxV3Zc8Z6.jpg)
Вай республикан кхыйолча школашка санна, тӀеххьара гургал бийкар Сурхо тӀарча ийс шера дешача школе а. Укх шера из яьккха ваьлар шин классе вагӀаш хинна 34 кӀаьнки йиӀиги. Уж накъабаха а царна ловцаш даха а гулбеннабар берий дай-ноаной, хьехархой, зӀамагӀйолча классашка дешаш дола бераш. Гулбеннарашта хьалхашка къамаьл дир школан директора Л. М. Хидриевас, классай кулгалхоша М. Аушевас, Р. Дударовас, кхетама балхах йолча директора гӀончас П. Нальгиевас, кхычар. Зизаш а совгӀаташ а делар шоай боккхагӀболча новкъосташта дӀахо деша школе бусараша.
Дийша баьннарашта юкъе ба, дика дешарца белгала а болаш, ийс шера алхха дика гойтамаш а долаш, чакхбаьннараш. Масала, царех я Аушева Айзан, Точиева Дали, Булгучева Ӏайна, Аушева Мадина, Измайлова Индира, Аушева Милана, Булгучев Мухарбик, Измайлов Мухьмад, Точиева Зубейдат, кхыбараш. Царех цхьабараша дӀахо а дешаргда юртарча тайп-тайпарча школашка, цхьайтта класс яьккха баллалца. Цхьачар шоай никъ бувзабергба колледжашца а училищешца а.
Шоай школа дӀа а яьккха, кердаяр еш латтарах, кхыча (№ 1 йола ГБОУ СОШ) школан тхов кӀалха шоаш бале а, безаме а дуккхача хана дицлургдоацаш а дӀадихьар дешархоша тӀеххьара гургал бийка ди.