Гуйран цӏай
Ишколашка берий ярмаркаш чакхйоах
Гуйре хоза ха я, е йӏайха а е шийла а йоацаш. Цул совгӏа, наха хозача эпитеташца белгалъяь а я из, ширача заман чухьа денз. Цхьачар цун бос белгалбеш оал «дошо гуйре», вокхар цун хьал белгалдеш, «йиза гуйре» оал. Я а я из йиза гуйре, хӏана аьлча цу юкъа чуэц деррига ӏалама беркат: ялаташ, сомаш, баьцадаараш - бӏарчча ӏанга кхоачам бу бе-беча даарий.
Из къаьстта дика гуш хул тайп-тайпарча ишколашка дӏакхухьача гуйренна хетаяьча дешархой ярмаркашка. Фу хургда цига доацаш? Цу тайпара ярмарка хилар Сурхо тӏарча ийс шера дешача ишколе. Бераш юртал эгӏара а магӏара а тӏаухар, бедоахкаш сомех, баьцадаарех дизза тускараш, тӏормеш долаш. Дуккхача берий бедоаллар ӏажагӏденна къоахка гӏа. Массехк урок яьнначул тӏехьагӏа дӏайолаелар дешархой гуйран совгӏаташ дохка ярмарка. Эцархошта юкъе духхьал бераш хинна ӏацар, ахча дӏакхувдадеш латтарашта юкъе бар хьехархой а. Масала, исторе хьехархочо Албохчанаькъан Увайса Ӏашата 600 сома хӏама ийцар берашкара, иштта берий базар тӏара ийца товар дихьар филологаша Исмейланаькъан Макшарипа Хьавас, Дзангенаькъан Вахийта Марета, кхычар.
Духхьал хӏама ехка ца ӏеш, яхь а яьржар 20 совгӏа йолча классан юкъе. Йоккхагӏчарна юкъе котало кхаьчар 9«б», 5«а» классашка; зӏамагӏчарна юкъе котъяьлар 1 «а», 4 «б» классаш. Цар эггара хозагӏа а дӏаьхегӏа а кийчдаьдар шоай истолаш.
Ярмаркера эца йиш яр дукха хӏама: бӏараш, бананаш, беттадуаргаш, моша хьажкӏа, хоарсам, мерза а кӏома а сибаз, помидораш, жӏале нускалаш, ябакхаш, яшаехка хӏамаш. Царна юкъе яр банкаш чу йоахка помидораш, компоташ, варенеш. Цхьаболча дешархошта шоай истол кийчде гӏо даьдар даьша-ноаноша. Дукха яр цига хьоарах хьаяь мерза а мерза йоаца а хӏамаш. Сона къаьстта езаенна моттиг яр, 2 «а» класса дешархошта юкъе шола яь Манкенаькъан Айшаи Аминаи хилар. Цар вӏаший тара хилар а дар-кха ӏалама совгӏат.
