Гӏалгӏай метта деза денош
Къаман дош эггара бочагӏа да
Тахана Гӏалгӏай республике дӏадолалуш да наьна метта 10 ди. Ший къам, да-нана, хьамсара мохк безача сага; цул сийрдагӏа а хозагӏа а цӏай хила йиш яц. Укхаза дагаух зӏамига волаш нанас даьха ага иллеш, эггара хьалха аьнна «нана» яха дош, ишколера хьаденна «Абат», дагахьа ӏомаяь хьалхара байт, кхы а массагӏа да уж.
Цу денна накъаболхаш, цхьацца кхетаченаш чакхъяха лаьрхӏад ишколашка дешача бераша, университета студенташа, йоазонхоша, журналисташа. Къаьстта а дика хетар, цу итт дийнахьа гӏалгӏай массайолча фусамашка алхха къаман мотт мара ца бувцаре. Белгалъяьча моттигашта юкъе да йоазонхошцара, журналисташцара вӏашагӏкхетараш, литератураца дувзаденна кинофильмаш, сочиненеш, байташ ешарий яхьаш, иштта кхыйола лоархӏаме моттигаш. Эггара дикагӏда хургдар цу 10 дийнахьа цхьанна дешархочо наьна меттах, литературах «2» ца йоаккхаре.
Къаьстта хоза хетаргдар цу деношка вай хьакимаша мел дувца къамаьл наьна меттала хилча, цхьадола балха каьхаташ цу меттала яздича. Из чӏоаггӏа ловш хиннав вай метта йоазув кхелла вола Малсаганаькъан Кураза Зоврбик. Цо из хозахета яьхадац, цунна гаьннара гуш хиннад гӏалгӏай меттах фу хургда. Тахан театраша увттаеш йола спектаклаш къаман мотт боаржабеш хургйоацилга ховш хинначох тара да цунна. «Ханума», «Дегаза боабашка кӏориг», «Цӏе кийнг», дуккха кхыяраш къаман мотт, культура, литература, театр дегӏакхувлаш яц. Уж геттара дика товш а тӏаэцаш а хургьяр эрсий театро оттайича, хӏаьта гӏалгӏай театро оттаераш къаман йоазонхой пьесаш хила езар аьнна хет. Цар дегӏакхувларгьяр лекъа яла йоалла вай драматурги.
Из ала йиш я вай ашарий дуненах. Хӏанз Гарри Поттера мукъамаш даха болабеннаб вай ашархой, кастта «Битлз» мукъамашка баргбац ала а дац. Дика хетар-кх къаман ашарий искусство дегӏухаргьяр доре. Литература-м гӏалгӏайдар дезац, йоах, эрсий меттала язде. Цудухьа арадувлараш метта хӏама тоаду книжкаш дац, из толхадераш да.
Беррига республикера бахархой цу сийрдача цӏайца, наьна метта деношца даькъалабувца лов. Наьна мотт боацаш ма дусалда шо цӏаккха, кхыдола метташ-м мичча хана а короргда шоана, бакъда наьна мотт бицлойя дӏадаргда, дицлургда вай деррига къам. Тӏаккха вайх хьахургда эрсий, черсий, гӏумкий, ингалсаш, амма гӏалгӏай-м хургдац вайх. Из диц ца дича дика хетар сона зӏамигачо а воккхачо а.
