«Бӏаьшерашта дагадоагӏар»

Дукхагӏа цо цу тӏа баь болх из оттадарца бувзабенна ба. Вай къаман вахара лоархӏамеча моттигашца дувзаденна  йоазош гулдеш, вӏашагӏтохаш къахьийгад цо, из боккха болх  беча юкъа. Цо ше дувцачох, цун хила вийзав мехкарча тайп-тайпарча архивашка. Книжка дийкъа да доккхача 8 даькъа: «Россеи Гӏалгӏайченои  барт бар», «Бокъонца дола Пригородни кхален а Бурон а истори», «Буро», «Мехкахбахар», «Исторе оагӏонаш», «1952-ча шергара 1992-ча шерга кхаччалца», «Шолжа кхален ханах а хьисапах а», «Мехкахдаьхача къамашта тӏера бехк дӏабаккхар». Уж доакъош цо ше цхьанне яздаьдац. Тайп-тайпарча автораша  бе-беча ханашка даь йоазош да цо  вӏашагӏтехараш. Царна юкъе ба моццагӏе а дунен чура дӏабаха а тахан вайна юкъе бахаш бола а нах. Масала, царех ва Н. Гриценко, И. Аверин, Г. Мартиросиан, Н. Волкова, Г. Ерещенко, Д. Ракович, В. Шнирельман, Базорканаькъан И., Патанаькъан Й., Арсамаканаькъан Б., Мутаӏаланаькъан Т., иштта кхы дӏахо а. Верригаш ткъаь пхийтта гаргга автор юкъевахав цу балха. Алхха гӏалгӏай къамах хинна ӏац уж йоазош даь нах,  царна юкъе ба эрсий, хӏирий, эрмалой, жугтий, нохчий, гӏалгӏай, кхыбараш.

Книжко бувц гӏалгӏай къамо, Россех дӏакхийттача хана денз, таханарча деношка кхаччалца хьабена бӏаьха а хала а никъ. Цу тӏа ювц гӏалгӏай ширача заман юрташ, Пригородни кхале хьайирах, Онгашта дӏадахачох а хӏанзарчох а, Буро-Шахьарах даь йоазош а тохкамаш а, 1944 шера мохк бохабарах, Нохч-Гӏалгӏай республика меттаоттаярах, царех тарра кхыдараш.

Йоазошта юкъе дукха исторически каьхаташ нийслу, царех да Россе паччахьаша а ах паччахьаша арадаьха амараш, СССР а РСФСР а боккхача хьакимаша тӏаийдаь соцамаш, кепайоазонаш, бе-бе картографеца дувзаденна тешалаш, сурташ.

Арадаьннараш 1000 книжка да, царна кепа техай «Пилигрим» цӏи йолча ООО Наьсарерча типографе.