Дукха хӀамаш йиса хиннай цо кепа ца тохаш, хӀана аьлча мохк бохабаро дуккхадар кӀалдита хиннад. 80-ча шерашка цун воша Ювсап вайзар сона, цунца къамаьл а хилар. Цо яьхачох, кепа тоханза мел дола йоазув шийга леладора цо, царна массанена цхьатарра кепа тоххалца. Цу тайпара моттиг нийсъяла мегаш яр кастта. Цхьан дийнахьа йоазонхой Союзо декхар оттадир Малсаганаькъан Абойна хьалхашка; Чахкенаькъан Капитона мел дола йоазув юха арадаккха, аьнна. Иштта арадаьлар цун «Баьте зоахалол» яха доккха книжка. Цу хана денз, 36 шу даьннад. ХӀанз юха а йоазонхочун кхоллам бовза йиш я таханарча деношка цунца чам болаш волча сага. «Моакхаза лоамаш» аьнна цӀи тиллай из арадаьккхараша кердача книжках.

Иштта цӀи йолаш хиннад цун чакхдаккханза дола роман. Массехк даькъах латташ да книжка. Из хьаделл Малсаганаькъан Абос язъяьча дешахьалхенца. Критик хиннача цо боаггӀаш бола мах баьб Османа Капитона кхоллама. ДӀахо еша таро я байташ, «Умалат» яха поэма. Укхаза дешачоа гургда цун гӀордаьнна йоазош «Сийле хийла», «Даьхен Ӏуйре», «Андаркъе Ӏаьла», кхыдараш. Книжканна юкъеяхай хьалха вӀалла кепа тоханза йола байташ, проза. Юххера, керда книжка чакхдоалаш, деша таро хургья Мерашканаькъан Султана даьча «Яздаь даланза долча романах дола дош» яха йоазув, Капитона вахарах а кхолламах а язъяь очерк.

Кердача книжко а беррига йоазонхочун кхоллам чулаьцабац. Масала, цу тӀа сона йовнзар «Октябрь» яха поэма. Из кораю вайна 1959 шера арадаьннача «Нана-Наьсаре» яхача книжка т1а. Хетаргахьа, книжка оттадаьраша лаьрх1ад из кердача заманга товш яц аьнна. Из харцахьа да. Ювцаш йола поэма цун кхоллама цхьа дакъа да, цудухьа моллагӀа зама цо ювце а, из юкъеяхьа езар кердача книжканна.