Дагардар нахага дувцар
Кердача книжкан йӏовхалах
Укх деношка «Сердало» газета редакце кхаьчад ӏилманхочун, прозаика, поэта Харсенаькъан Бориса кхаь книжках латтача гулламцара хьалхардар. «Дагардар дувцар» яхаш да из. Борис эрсий меттала яздеш ва. Дӏаьхийча эрсий литературанна юкъе белгалвала хала да, хӏана аьлча Пушкина, Лермонтова, Есенина, Маяковске байташ йийшачул тӏехьагӏа, сага тоам беш дола йоазош кхолла аттача декхарех дац.
Хӏаьта а поэмаши байташи юкъеяхача цун хьалхарча книжках, из дешаш волча сага йӏовхал хьаювл, цун байташа вахара чоалханеча оагӏоний уйла яйт, цкъаза дегагӏоз а сагото а яхь. Ма дарра аьлча, бокъонца дола вахара басараш да поэта байташ язъеш пайда ийцараш. Цудухьа цун уйлаша саг каравуг, цо дувцачох теша безам хул.
Гуллама хьалхарча книжка тӏа я ши поэма: «Малги Беки», «Даьймохк». Книжка довзийташ даьча йоазон тӏа белагалдаьккхад, уж багахбувцама кӏийлен тӏа язъяь хилар. Цар дувц лоамарой денал, майрал, къонахчал, кхыйола сагах яхка хьакъ дола дика оамалаш. Цу даькъах поэта цӏи тиллай; «Дуне безама кхелла да», аьнна.
Шоллагӏа дакъа «Сийрдача елакъажара кеп» яхаш да. Цунна юкъеяхай лирически байташ. Царех дукхагӏъяраш хетаяьй кхалсага. Цунцара вӏашагӏкхетараш а къастараш а, дог гӏоздоаха а гӏайгӏане дуга а мугӏараш да ала мегаргда царех. Иштта цу даькъ тӏа я вахара тайп-тайпарча оагӏонашта, кердача шера, кхыча моттигашта хетаяь байташ.
Къаьстта а тоам беш я поэта кӏаьда оаз, байташ ешача хана, ладувгӏа йиш хозаш санна хеталу. Иштта байтий техкнически оагӏув: ритм, рифмаш – дика вӏаштӏехььяьннай аьнна хеталу сона.
Книжканна юкъедахад тайп-тайпарча суртанчий балхаш, цар кхы а безамегӏа ю цун оагӏонаш.
Харсенаькъан Бориса гуллама хьалхара книжка дийшар поэта а цун деша говзала а раьза хургва аьнна хет. Гӏалгӏай литературе хоза оагӏув хинна даха дусаргда кердача книжканна юкъера йоазош. Дика книжка арадаларца из даькъалавувца лов.
