Театра актрисай никъ
Коазой Дугурхана 60 шу дизад
Дукхача хана денз, театре болх беш хьаена актриса, ах вахар телевиденена хетадаь журналистка Коазой Дугурхан ца йовзаш саг вай республике хуле тамаш я. Цо дакъа лоацаш хиннай дукха спектаклаш а кинофильмаш а. Ленинградера театральни институт яьккхача цо тайп-тайпара ролаш ловзаяьй. Масала, царех я Н. Гогола «Ревизор» яхача пьесан юкъера Анна Андреевнай роль, Чехкинаькъан СаIида «Къонгаш бовча хана» яхача пьесан юкъера наьна роль, Ж. Мольера «Ца воалаш йоалаяь саг» яхача пьесан юкъера Дорименай роль, «ЦIий кхайк» (боканаькъан Ахьмада «Беке къонгаш») яхача пьесан туррпалла Кайпий роль, Р. Ибрагимбекова «ГIаш лела Махьмуд» яхача пьесерча секретаршай роль. Духхьал спектаклашка дакъа лаьца ца Iеш, кинофильмашка а къахьийгад цо. 2019 шера 1-ча канало хьахьекхар «Тха коа-2» яха дизза дола исбахьален фильм. Режиссёра Музалёва Ольгас даьккхача цунна юкъе Дугурхана ловзайир лора-терапевта Махмудовай роль. Эггара тIехьа цо кино ловзаяь роль яр ВГИК яьккхача режиссёра Iамархананаькъан Амура «Сайти-Зоуле воI» яхача лоацача фильме. Сайте наьна Зоуле роль яр цо цига ловзаьр.
Ахьмада Дугурхан яь хиннай 1962 шера, дуккхача йоазонхой а, цIихезача тIемхой а, хьехархой а юрта. БархI шера дешача школе ягIаш, цхьанна хIамо дицдергдоаца хатар доагIа цунга. Ший шийтта шу даьннача хана, эггара хьамсарагIа вола саг — нана йоацаш юс йиIиг. Наьнах къастар мел хала да ховргдац, бокъонца из йоацаш висача сага мара. ХIаьта а халонашта, гIайгIашта ка ца луш; хьабенаб цо ший беррига вахара никъ. Кхыметтел цIен-да дIаваьлча а, вахарах дог ца дуллаш, ший йоI кхееш, цунга дешийта гIерташ, мехка а къаманна а накъаяргйолча тайпара из ураоттае гIерташ, къахьийгад Ахьмада Дугурхана. Цудухьа, цун дог деладеш, хьалкхийнай из. Ами Амер яхаш йола журналистка, Магасерча НТРК болхло каст-каста го йиш «Довзаш хургда вай» яха передача дIахьош. Из Дугурхана йоI я, цо чакхъяьккхай ГИТИС. Дугурхан ше а я цу телевидене болх беш а, каст-каста вайна дика чулоацам бола передачаш кийчъеш а.
ГIалгIай Республикан гIоръяьнна артистка, ГIалгIайчен искусствай цIихеза болхло, актриса, сцена говзанча, журналистка, сценарист, документальни кинон рижиссёр даькъалаювца лов, цун 60 шу дизарца. Хетаргахьа, кхы а дуккхаза вай дегаш деладергда цо ший кхоллама говзалца.
