Хьехархой даькъалабувца Ди
Къона тӏехье оамалца кхееш
Укх деношка республикерча ишколашка хьехархой даькъалабийцар цар балха цӏайца. Цу тайпара моттиг хилар Сурхо тӏарча ООШ. Из я ийс шера деша ишкол. Йоккхача, сийрдача актови зале гулбелар дешархой а хьехархой а. Сцена тӏара декар хьехархошта карагӏдувла дика гӏулакхаш дувца дешаш. Цу ишколе дукха ба йоккха поалхам йола, дуккха шераш шоашта дукха безача къахьегама дӏаденна нах. Царна юкъе ба Россе а моттигерча дешара а еза цӏераш лелаеш бола нах. Царех я Дударанаькъан Радимхан, Лида, Овшанаькъан Аьсет, Ӏаьленаькъан Лейла, Загӏенаькъан Мадина, Исмейланаькъан Сацита, Овшанаькъан Макка, Налганаькъан Паьтӏамат, Хидренаькъан Залина, Зангенаькъан Марет. Царна уллув къахьегаш хьабоагӏа, шоай балхах кхеташ, из хьабе ховш бола къона хьехархой Исмейланаькъан Паьтӏамат, Милана, Хьава, Залина; Муцолганаькъан Аьсет, Албохчанаькъан Ӏашат, Овшанаькъан Милана.
Дукха беце а, ишколе ба хьехархой маӏа нах. Физрук Муцолганаькъан Заьудина Хӏарон, Котанаькъан Салмана Ахьмад, къаьстта а балгалдаккха лов цу ишколерча берашца иллиалархой говзал ӏомаеш, шийга кӏезига йола мукъа ха дӏалуш, цига каст-каста воагӏаш гӏорваьнна иллиалархо, композитор Дзейтанаькъан Тимур хилар.
Хьехархой денга цои укх йоазон автореи кийчъяьяр ишколан гимн. Вешта аьлча, мукъам бар Дзейтанаькъан Тимура, дешаш – Ӏарчакханаькъан Сале. Из гимн тамашийна хоза дӏаоалар 7 класса дешархочо Муцолганаькъан Салимас. Хӏанзчул тӏехьагӏа ший гимн йолаш хургья Сурхо тӏара ООШ.
Ишколерча хьехархой тоабанна дукхача хана денз кулгал деш хьайоагӏа историк Хидренаькъан Мухтара Люба.
Хьехархой ди дездеш, дийкар байтий мугӏараш, иллеш, лоамарой халхараш гойтар.
