Керда дош ала гӏерта саг
Къонача поэта байтий гулламах
Эггара хьалхара книжка поэта юхь-сибат, уйлаш, нигаташ довзар санна хӏама да. Цо хьагойт из саг цӏенхаштта ший никъ болаш ва, е хозахета, саготалла байташ язъеш ва. Укх шера Наьсаре «Пилигрим» оалача ООО арахийцад Налганаькъан Илеза «Сина талгӏеш» яха байтий книжка. Илез кхийна а вахаш а йола юрт я Пхьилекъонагаша йиллар. Кердача книжка тӏа типографел совгӏа цӏенхаштта къахьийгад кхаь сага: автора, редактора, корректора. Цун редактор хиннай Къаман библиотеке болх беш йола Коазой ӏашат, из ше а поэтессай никъ тӏаийца хьайоагӏаш я. Хӏаьта корректор хиннай вай университета болхло, йоазонхо Новразанаькъан Макка, из а Илеза юртхо я.
Фу дувцаш да керда книжка? Цу хаттара дикагӏа жоп лургда аьнна хет сона Коазой ӏашата аьннача редактора дешо. «Сино йӏовхал лехача хана...» яхаш корта болаш, цу йоазонна а кепа техай байтий книжка тӏа. Исроапила ӏашата язду: «...Ший кхоллам Илеза хетабаьб бусалба дина, гӏалгӏай къаманна, хьамсарча Даьхенна, ӏалама хозала. Наьнацарча безамах дувц, дог тохадолийташ. Йоӏацарча безамах дувц, эздийча зӏамсага санна...»
Иштта книжка тӏа я корректор хиннача Новразанаькъан Маккас язъяь «Дешхьалхе». Цо белггаларча байтех а Илез шийна, дукхача хана денз, вовзарах а дувц.
Книжка ший дика оагӏонаш а, цхьацца кхоачамбоацараш а долаш да. Эггара хьалха бӏарг тӏаотт гӏалат деш дӏаязъяьча книжках тиллача цӏера. «Син талгӏеш» ала дезача «Сина талгӏеш» аьннад, Доала дожар тувладаьд Лура дожарца. Автора тайпан цӏи кӏаьда хьарак (ь) юкъе долаш язъяьй, тахан йолаш йола метта бокъонаш телхаяр да из. Дуккха дешаш да дошкхоллар, орфографи телхаеш: тамашена, гаьна ваьлча, юха тоха – нийса яздеш хилча тамашийна, гаьнаваьлча, юхатоха хила дезар. Цхьан мугӏарца кхо гӏалат даьд: «Сийдола тӏехьле духьа» - нийса яздеш хилча «Сийдолча тӏехьален духьа» ала дезар. Кхы а да уж гӏалаташ-м. Цхьа стихотворени шозза кепа техай. «Дуне техкаш, наькъаш хувцаш» яха байт нислу вайна 103, 104 оагӏонаш тӏа.
Илез хӏанз язде волалуш мара вац. Цудухьа ха дӏа мел йода тоалургья аьнна хет сона цун байтий технически оагӏув. Хӏанзарчоа ритм, рифмаш дика вӏаштӏехьаялац цун. Уж къахьегамо дӏанийсдергдолаш хӏамаш да.
Книжка арадаларца даькъалавувца лов къона поэт. Дика хет керда цӏи вай литературанна юкъейоагӏаш хилар.
