ЦӀихезача журналистах бола дагалоацам
Курскенаькъан Ювсапа 90 шу дизад
Укх деношка 90 шу дизад ГӀалгӀай мехка дика вовзаш хиннача журналиста Курскенаькъан Ювсапа. Из ваь хиннав 1934 шера ардара бетта 20-ча дийнахьа, лоаман ширача Лаьжге. Цар дезале 8 бер хиннад, бакъда цу ханарча къахетам боацача Ӏаьдало цунгара воаккх берий коггӀортолга хинна да, 1942 шера НКВД болхлоша цӀагӀара дӀавига из кхы цӀенах кхетац. Бера ха Ювсапа а цул зӀамагӀбарий а шийлача, мецача Казахстане хиннай. ХӀаьта а деналах, эзделах ца вохаш; хьалкхийна зӀамига саг дуккхача ший мехкахошта дика масал а хинна ваьхав, цу гаьнарча мехка а цӀавеначул тӀехьагӀа а.
Ше итт класс яьккхачул тӀехьагӀа, из деша вода Алма-Атерча юртбоахама институте, бакъда вахарца дувзаденна цхьацца бахьанаш нийсдаларах, цо чакхдаккхац из дешар. Вайна цӀадахка мукъа бенначул тӀехьагӀа, из юха ший мехка воагӀа, 1958-ча шера Нохч-ГӀалгӀай радио къахьега волалу из, цу хана денз, ше валлалца журналистий мугӀаре волаш, хьинаре къахьегаш, чакхвоал Ювсап. Юххьанца цо кулгал дир корреспонденташцарча бувзамий даькъа, цул тӀехьа йӀаьххача хана юкъара-политически редакцена керте лаьттар. Цун дукхагӀа йола передачаш ювзаенна яр къаман эзделаца, цун сий лорадарца, вахарерча лоархӀамеча дешашта, юртбоахама, доттагӀала, и. кх. дӀ.
ГӀалгӀай Республика хьаяьчул тӀехьагӀа, радио а телевидене а болх бир цо. Цун передачашта юкъе яр доттагӀалах, мохк дегӀаахарах, къамаша дикагӀа йола балха поалхам дӀа-юха екъарах йола передачаш. Масала, царех цаӀ яр, «Вай лоалахой болча» яхаш. Цу передачага гӀолла Ювсапа дувцар ХӀирийчен Пригородни кхале бахача нахах, цар къахьегамах, вахара хьалех.
Ювсапа новкъостал дора къонача, кхувш боагӀача журналисташта. Масала, царех вар Ӏахилганаькъан Микаил, Мерешканаькъан Султан. Сона а хийла хьехамаш деш, къамаьл дора Ювсапа, Шолжа-ГӀалий тӀарча радион цӀагӀа нийсвелча. «Цо болх могабарах, радио балха хьехарах, цига къахьега волавелар со», - аьле, Ювсап хийла дагалувцаш хезав сона Мерешканаькъан Султана. Цунца болх баь бар вай дикагӀа бола журналисташ Овшанаькъан Мустафа, Малсаганаькъан Або, Пхьилекъонгий Махьмад-СаӀид а Махьмад-Рашид а, Гаьгенаькъан Гирихан, ЦӀолой Руслан, Шакренаькъан Батарбик, кхыбараш.
Ӏаьдало лакхара совгӀаташ а цӀераш а еннаяр цунна, хьийгача къин мах беш. Из вар СССР журналистий Союза доакъашхо, «Нохч-ГӀалгӀай АССР культуран гӀорваьнна болхло», «ГӀалгӀай Республикан культуран гӀорваьнна болхло». Иштта цунна еннаяр вай республике эггара езагӀа лоархӀаш йола «КарагӀдаьннарех» яха орден.
Кхелхав Курскенаькъан Ювсап 2008 шера чиллан бетта, ший 74 шу даьннача хана.
