«Корсама кӀалха совгӀаташ доасташ,

Эггара доккхагӀа дола совгӀат хьо да…»

СапарӀаланаькъан Микаил вовзаш а цун кхоллам безаш а бола йоазанхой, хьехархой, дешархой вӀашагӀкхийтар цу дийнахьа. Кхетаче йийкъа яр кхаь даькъа. Хьалхардар - безамах лаьца байташ. ШоллагӀа дакъа - наьнах лаьца мугӀараш. Долакха-Юртарча ишкола дешархоша йийшар Микаила байташ. КхоалагӀа дакъа латтар тайп-тайпара чулоацам болча байтех.

Гулбеннарашта хьалхашка ше къамаьл деш, культуран цӀен исбахьален кулгалхо йолча Манкенаькъан Зинас бовзийтар, къонача поэта кхоллама никъ. Цо иштта белгалдир, дукха ха йоацаш, «Ткъаь 33 кхойтта» (2021шу), «Меттаза лув са йоазон зизаш» (2022 шу) яха байташ тӀайола книжкаш цун арадаьнна хилар. Цул совгӀа, къонача поэта вай иллиалархошца а болх бу, цун байтех латта мугӀараш хаза йиш я вай мехка, дика бовзаш болча иллиалархоша дӀаоалаш. Радион чугӀолла, телевидене концерташка «Беттала наькъаш», «Даьре бийса», «Безаман фесархо», «Йиц ма елаш са ганз», «Къаръяьй замано» яха иллеш дӀаоал ГӀалгӀай Республикан халкъа артистка йолча Охценаькъан Розас. Кхы кӀезигагӀа наха юкъе хозаш дац цун дешаех Эккажанаькъан Маринас дӀаоалаш дола иллеш: «Керда бӀаьсти», «Са эздий да», «Са мехка сурташ», «ВорххӀе даь ханара», «Бурчолгаш хехкаш».