Лоаман кадетий корпус Ӏалама хозача моттиге я, хьалха Сурхо тӀа эскара доакъош лаьттача хьун юкъе я из. Дешара мел эша хьалаш хьакхоллаш, керда гӀишлош хьалъяьй цига, республике дикагӀа бола хьехархой хиннаб корпусе тайп-тайпара Ӏилмаш хьехаш, царна юкъе хиннаб Чуранаькъан Фатима (ингалсий мотт), Агенаькъан Фатима (географи), Малсаганаькъан Мухьмад (гӀалгӀай мотт, литература), Хилько Любовь (эрсий мотт, литература), ГӀарбакханаькъан Люба, Малсаганаькъан Зарема (ашараш), кхыйола тайпан цӀераш лелаю нах.

Сийлахь-боккхача Даьймехка тӀема доакъашхочун Цхьорой Ӏаддала цӀи лелаеш йолча цун дешархой тара хила гӀерт догмайра разведчик хиннача мехкахочоа. Цига деша деза 7 шера. Эггара хьалхара цун дешархой кадетий корпус яьккха баьннаб 2001 шера. Уж верригаш а 45 саг хиннав, царех цхьабараш дӀахо а тӀема дешарца шоай кхелаш ювзаяь дӀабахаб, цхьабараш машарера балха говзалаш Ӏомае лаьрхӀа, бе-беча лакхарча дешара моттигашка дӀанийсбеннаб. Цига дешаш хиннача наха юкъе ба лораш, паччахьалкхен болхлой, экономисташ, тӀемхой, юристаш, кхыбараш.

Тайп-тайпарча ханашка цун керте лаьттаб Паражанаькъан В., Пхьилекъонгий Ӏ., Чуранаькъан С., Цхьорой М., Потатуев А., Гойганаькъан С., Мержой М., Кхоартой Я., Дударанаькъан Т., Дидиганаькъан Ахьмад. Карарча хана цун керте латт Хамхой Тухана Беслан.

Лоаман кадетий корпуса сий лакха лоаттадеш, хьабоагӀа цун тхов кӀалха дешаш бола кагирхой, шоаш санна йолча корпусашта юкъе хьалхара моттиг цкъа яьккха Ӏийнабац цига дешараш. Къона тӀемхой болча хьоашалгӀа хиннаб республике баьхка дуккха а цӀихеза хьаьший.

Паччахьалкхено йоакхо еш, хьакхеллад царна мел эша хьалаш. Уж Ӏалашбаь ба тӀадувхачунца, дуачунца, дӀа-хьа кхувлача дикагӀа йолча автобусашца, дешара гӀирсашца, бувша-гӀовтта мел эшача моттигашца. Из ховш, цун хам беш ба цигара дешархой а. Даькъалабувца лов Лоаман кадетий корпуса хьехархой а дешархой а, кадетий корпус хьайийллача денз 30 шу дизарца. Из цӀай дувзаденна да, укх маьтсела бетта 17-ча денца.