Укх шера 25 шу дуз Наьсарера искусствай школа хьаяь. Хьалха, вай Сибрера цӀадаьхкачул тӀехьагӀа яь хиннар, хӀирашкахьара беха Ӏобаьхка нах бахаш лаьттар цхьан юкъа. Цул тӀехьагӀа берашка дешийта, цу чу болх бе пайдана йоацача кхаьчаяр из. Дахчах яь, тӀехнахьа ардакх тӀатеха, баьццара басар хьекха яр къаьнара школа. Дукха пианисташ, пандарчаш, дахчан пандар локха бераш кхедаьдар цун тхов кӀалха. Цу чу деша дӀаболабенна бар вай таханара композитораш Шадажнаькъан Фариза, Малсагнаькъан Зарема, культуран министра заместитель йола Ильясанаькъан (Мусенаькъан) Ӏайна, кхы дуккхабараш. 1996-ча шера, из дӀа а яьккха, цига хьалъяьяр цхьа гӀат дола кирпишкий школа. Вешта аьлча, 16-ча сентябре нийсса ткъаь пхиъ шу дуз из хьайийлла. Цу хана республика хала йоаллар, эшараш-доацараш дукха дар; из бахьан долаш сиха а талмаста а яьяр из. Карарча хана, цун куц-сибат эргадаккха лаьрхӀад культуран министерствос. Из болх чубоагӀаш ба «Культура» яхача Россе халкъа проектá. Школан тӀера тхов хьалъийцаб, кораш-наӀараш хьадаьхад. Из болх дӀаболабаьб август бутт болалуш.