Барта гӀалан 10 шу дуз
Магас-Шахьар хозъяьча гӀишлон хьакъехьа
Вай къаман керттерча шахьар тӀа Магасе наьха дукхагӀа теркам тӀаозача гӀишлонех цаӀ я Барта гӀала. Из цаховш нийсъеннаяц шахьара юккъе. Вайна ховча беса, гӀалгӀай ширача заман чухьа денз белгала хиннаб гӀалаш ярца, гӀала яхача дешагара хьадоагӀаш да гӀалгӀа яха дош а. Вешта аьлча, ерригача Къилбаседа Кавказе гӀалаш ярца дукхагӀа белгалдаьнна къам хиннад вайдар. Цудухьа хержай къаман белгало а хинна Магасе латтаргйола гӀишло.
Барта гӀала хьалъе йолаяь хиннай 2012-ча шера, ховш ма хиллара, вай даьша хьал ца еш юташ хиннай гӀала шин тайпара бахьанаш нийсделча. Хьалхара бахьан хиннад, из хьалъеш вола тӀоговзанча валар, шоллагӀдола бахьан — нийсса цхьан шера из хьалъяь ца йоале. Цудухьа Барта гӀала хьелъе лаьрхӀа хиннад цхьан шера. Цу декхарех лоархӀабаьб из етта гӀишлонхой.
ГӀала хьалъяь яьннай 365 дийнахьа. Кхыча дешашца аьлча, из етта яьннай 20Ӏ3-ча шера. Укх шера итт шу доал цун. Ювцача гӀишлон архитектор хиннав Ткаченко Сергей.
ХӀаьта из хьалъеча эггара хьинарегӀа дола дакъа лаьцад вай мехкахочо Харсенаькъан Ӏалихана. Цун чотагӀа хьалъяьй аьлча, нийсагӀа хургда. ГӀала 100 метр лакха я, цун пенаш 50 метр шера да. ХӀара гӀат хьалдеш 85-90 кубометр бетон дӀаяхай, еррига цунга дӀаяха бетон я 8,7 эзар кубометр. ХӀаьта арматурах дувце, цунга дӀаяхай 1,5 эзар тонн арматура. Таханарча дийнахьа цун фусамаш хозъеш да вай профессиональни суртанчий дикагӀдола балхаш, даьй вахар довзийташ дола гӀирсаш. Ший тайпара музей а хинна, дӀаэттай гӀала.
