Кагирхошта дола доккха совгӏат
Магасера стадион хьайийллар
Дикка ха яр Пхьарчанаькъан Мухьмада цӏерагӏа Магасера стадион тишача ден тӏа яха латта. Мехкадаьга наха дехар дарах, из тоае лаьрхӏар, цун майдаш дикка эргайоахаш. Хӏара дийнахьа цунна юххегӏолла тӏехвувлача сона гора мишта къахьег из болх дӏаболабаьча наха. Хьаьха, басар хьекха ӏооттайир гонахьарча карта лард, цун лакхе гобаьккха теха, къоргаш яьнна тиша цхарал дӏабаьккхар, керда а шолха а цхарал техар, футбола майдан тӏа наха шоаш хьабаь керда бай биллар, кӏайча басарашца жӏакаш хьекхар, керда гӏандаш оттадир наха ӏоховша таро луш, яйгача атлетиканна дола наькъаш кердадаьхар, тоайир баскетбола, волейбола майдаш.
Республикан 34 шу дузача дийнахьа, хьайийллар стадион, Гӏалгӏайчен хьалхарча президента Овшанаькъан Руслана, хӏанзарча мехкадас Келаматанаькъан Махьмуд-ӏаьлас дакъа лоацаш. Хӏанзле хьалхара яхьаш а хиннай стадиона тӏа. Масала, дӏадахача пӏаьраска дийнахьа стадиона тӏа ловза вӏашагӏкхийтар Наьсарера «Вайнах» яха тоабеи Нальчикера ФШ футболисташи. Ловзар гулбеннача наьха теркам тӏаозаш, дуккха ира моттигаш йолаш хилар. Цунга хьежжа дукха чуйийтта бургацаш йолаш а хилар из вӏашагӏкхетар. Амма вай футболисташкахьа хиланзар цу дийнахьа аьттув. Уж эшаш чакхъяьлар шин республикан яхь. Чот 5:3 йолаш, хьаьший котбаьлар.
Хӏанз стадион йиза хул спортаца а физкультураца а хьоашал долча нахах. Къонача футболисташа дӏахьу цига шоай дешар-ӏомабалар. Сайре тӏаеча баскетбола а волейбола а майдашка ловза, самукъадаккха арабоал гонахьарча коашка, цӏеношка баха йиӏигаш а кӏаьнкаш а. Индера баьхкача, вай университете дешаш болча студенташта дукха езача моттигех цаӏ я ловзарий майда.
Ала деза, кхувш боагӏача кагирхошта дикадар, накъадаргдар ӏомадеча гӏулакха доккха дакъа юкъехьош я столицера стадион. Укхаза бургацах ловзарал совгӏа, болх беш я жӏакай (шахматий) ишкол, вӏашагӏдехк, дӏакхухь тайп-тайпара цӏайш, спортивни яхьаш, зуламерча хӏамашта гаьнабоах вай кагирхой.
Цхьацца цамагараш долча наха а накъайоал из моттиг, ӏуйрийна стадиона тӏа ада, гобаха боагӏа гӏелбала ловш бола нах, гош мукъадаккха безам бараш, садахарца хало озараш, кхыбараш. Лоацца аьлча, магасхой вахаре лоархӏаме моттиг дӏалоацаш, цар унахцӏено хьаллоаттаеш хиларца дуккхача шерашка белгала хиннай хьинар долча наьха вахар дувзаденна стадион. Дӏахо дӏайодача хана а, цо иштта теркам тӏаувзаргба, аьнна, хет вай кхувш доагӏача ноахала; цига хьахургба, аьнна, хет говза шахматисташ, футболисташ, яйгача атлетикаца хьоашал дараш. Цу гӏулакха царна мел эша хьалаш хьакхеллад вай паччахьалкхено а Магаса администраце а.
Юххера а, цхьаькха цхьа хӏама белгалдаккха ловра сона, цох лаьца каст-каста оал вай Мехкадас: «Хьадаьр лораде деза».
