Йоккхача Ачалкхерча почта йисте йоаллача остановканна кӀалха даьлла хьал бӀаргадайна, администраце болхлой, укх гӀулакха тӀахьожам лоаттабе декхарийла бараш ер ца гуш багӀа-хьогӀ, аьнна, хетаделар сона. ДӀакӀалхаваьнна Ӏоотта хала долаш, хьал дар цига хиннар. Колдах хьалйикъа, кӀалха улла плитка хотто къайлаяьккха, ког Ӏооттабе моттиг лаха езаш яр. Къаьстта из остановка массахана дукха нах хулаш моттиг я. Юхе почта, йоккхий тикаш, ишкол я. ХӀара Ӏуйран балха болхача нах, студенташ дукха болаш хул из моттиг.

Даггара латкъаш яр хӀара дийнахьа цигара балха дӀауха кхалсаг, сов чӀоагӀа цу кӀалха бӀеха йолаш, юстара латта дезаш хул тхо, яхаш. Цо из дийцачул тӀехьагӀа-м дикка ха яьннай, юхе гӀолла тӀехбувлаш бӀарг кхийтта а, цу кӀалха латтача нахах эхь- бехк хийтта тохабенна а хургба, аьнна, хийттадар сона цу гӀулакха бехктокхаме бараш, бакъда хьал ше хиннача беса да. ДогӀа доацача хана-м юстара латтаргба нах, ӀотӀаелхаш тӀоадал хилча, мичахьа кӀалбовла беза цар?!

Доккха хӀама дац цига де дезар. Белаца кӀалхара хотта дӀаарахьекха, кӀийле хица йилача баьнна болх ба-кх из. Иштта мара терко йоацаш латтаргьяле, хьа а фу де яьй уж остановкаш, аьнна хет-кх! Наха аьттонна яьяле; догӀах, малхах хьулавенна саг дӀакӀалхавала йиш йолаш хила езаций уж?! Теша лов, ер газет администраце болхлошта бӀарга кӀалха нийслургхиларах…