Маьждиг хьадийллача дийнахьа денз, юртарча бахархошта дин довзийтара тӀехьа къахьегаш ба цига. Хьалха дӀахьош хиннача урокаш тӀа, кхы а керда урокаш ӀотӀакхийттай цига. Таджвид (КъорӀа Ӏомадар), Тасхих (КъорӀа шаьрдар) яха хьехамаш тел маьждиге кӀира шозза маӀача наха, кхалнаха. Оршот дийнахьа, ерача дийнахьа дӀакхухь цига Тафсираца (КъорӀа довзарца) дувзаденна хьехамаш. МаӀача наха а кхалнаха а пайда эца йиш йолаш да из дешар.

Цул совгӀа, хьатӀадоагӀача кӀира дӀайолае лерхӀаш я маьждиге цхьаькха керда урок - Фикъх (бусалба дин бокъонаш). Из хьехаш хургва маьждига имам Зурабанаькъан Хьамзат. Еррига урокаш, мах бала ца безаш, дӀакхухьаш я. Белгалде деза, юртарча бахархошта хам а мах а баь варгвоацаш доккха дика из долга. Ше вахача юрта Дала иштта доккха дика доаржадар, эггара йоккхагӀа йола гӀозале я. ДӀахо ха безам бараш, маьждиге хьавеначунна довзаргда. Хьадувла, пайда эца Даьла наькъ тӀара! Беркате хӀама шоай дезалашта довзийта аьттув ба шун тахан.