Тахан а цу тайпара, бокъонца дола цӀай хинна, дӀаэттар Наьсарерча Сервиса а быта а колледже дӀадихьа хинна вӀашагӀкхетар. Цун хьалха лаьттар яр колледже гӀалгӀай мотт, литература хьехаш йола Новразанаькъан Макка. Цунна новкъостал дир колледжа кулгалхочо Заьзганаькъан Асхьаба Аслана. «ТӀагӀолла а ца хьош, лерттӀа болх дӀабахьа беза гӀалгӀай мотт дегӀабоалабеш», — аьлар Аслана, яхаш, белгалдора Маккас, ше тхоца къамаьл деш.

Укхаза вӀашагӀъелла ворхӀ пхьоалле яр. ЦаӀ — берий пхьоалле, цига берий бешамашкарча балха кийчо, юкъе нийслуш дола кхоачамбоацараш дувц. ДӀахо йоазанхой ӀT-пхьоалле яр ювцаш. ӀT- говзанчаша шоаш арахийца, кхелла болх гойтаргба, дӀахо малагӀа керда наькъаш лохаргда, малагӀа наькъаш хоржаргда дувцаш, хургба из болх.

Укхаза эксперта юхь йолаш венача «Сердало» газета журналиста Курскенаькъан ИбрахӀима белгалдир, ер мо йола форум эшаш хилар а ший балха тӀа де лерхӀар а. «Тахан тхоашта карагӀдаьнначун тӀа саца лаьрхӀадац тхо, — аьлар ИбрахӀима, — дӀахо а керда наькъаш лохаш хургда тхо, ма хулла гӀалгӀай метта хьал аттача даккхара». Ховш ма хиллара, дукха ха йоацаш, ИбрахӀима хьадир электронни дошлорг, из вай хӀара вахархочунна го йиш я ший компьютер чу.

Укх кхетаче иштта яр мультимедиа пхьоалле а. Цунна кертте латтача Матенаькъан Илеза дийцар берий фаьлгаш, таржам деш, цхьан оазаца доагӀаш хургдолаш, царца гӀалгӀай мотт дегӀабоагӀаш хургболаш, къахьегаш да тхо, аьнна.

Грамматикаца дувзаденна вай метта юкъе керттера деш дола гӀалаташ дувцаш а моттиг хьаяьяр укхаза. ДӀахо цу даькъ тӀа де дезар а дийцар.

Хьаьший дукха бар. «Хьабийхарех цхьа итт саг воагӀе а, вай мотт байнаб ала йиш яц, аьлар аз», — яхаш, дувцар тхона Маккас. Бакъда укхаза хьавенараш 60 саг вар. Уж берригаш а дувцача хӀаман мах бе ховш а бар. ТӀаккха из деций вай меттаца бала болга а, из бахаш хургболга а, аьлар цо, ший къамаьл чакхдоалаш.