Ярмаркаша лораду маьхаш, базархоша ийду
Мишта латт дохкара-эцара гӀулакх?
Мархий бутт болалуш, республикерча дин викалаша а кулгалхоша а, кхачанна маьхаш тӀацадеттар дийхадар вайцигарча базархошка. Иштта дех из, хӀара шера беза бутт хьатӀакхоачача хана. Республике еш ярмаркаш а я, наха эцаш йола хӀама езача хана дарегӀа хилийта гӀерташ.
Дуккхача нахá царех гӀойле а новкъостал а хул. Амма базар тӀа латтарашта деш дола дехараш, маьхаш ий ма де, яхар дӀа ца хезачох тара да. Наха дукхагӀа дуача, дӀаийдеча хӀамашта тӀадетташ дола ахчаш дикка лакхлуш латт. Цу тайпара да дулх, котамаш, москалаш.
Тахан дулха мах 530 сомага кхаьчаб, мархаш гарга мел гӀарт кхы а айбала тарлуш ба. Марха лацале 550 доаккхаш хиннача котамех, хӀанз 650 дала деза. Юкъера москал 3000 доацаш эцалургьяц, «Фабрика» оалача базар тӀара. Чувенача хьаьшанна оттае мегаргйолча нарсий-помидорий мах 200, 250, 270 сомага кхаьчаб. Нагахьа санна ярмаркашка апельсинех 100 сом доаккхе, укхаза 120 доаккх, баьца комарий кийлах – 450 сом. Лакха да Ӏажий маьхаш а.
Йовлакхаш дохкаш моттиг сона цу дийнахьа йовнзар, бакъда маӀача наьха пазаташ геттара еза хийтар сона, арахьара тӀаена йохкараш къаьстта а. Цар маьхаш 250-450 сомага кхоачар. Моттигерча исташа йохкараш чухьнахьа яр 150-200 сом.
Лоацца аьлча, бахархой къий а луш, базархой бӀаьхий а хулаш, хӀама да мархий бетта латтар.
