Олимпиадан къахьал
Наьна мотт теркалцабар
Хьалхара четверть чакхйоалаш, бераш салаӀа дӀадахалехь, тайп-тайпарча Ӏилмаех йолча олимпиадан ишколера бӀал хилар. Ткъаь диъ Ӏилма юкъедихьад цунна, цу Ӏилмаех къовсадала дезаш дар бераш, шоашта ховраш гойташ. Царна юкъе дар эрсий, испански, китайски метташ, кхыдараш. Юкъейихьаяр физкультура, къахьегам, бакъда цу 24 Ӏилманна юкъера сона корабанзар олимпиада дӀахьоча моттиге дахача къаман мотт. Цул совгӀа, ишколашка из дӀа мишта яхьа еза, тӀадехкаш дола декхараш, хаттараш малагӀаш да хьадайтадацар ишколе.
Хьехархоша шоаш оттадергда аьнна дита хургда цар уж, е гӀалгӀай мотт эшаш бац аьнна хеташ Ӏийна хургба. Сога хаьттача, из болх лерттӀа хьацабар эхь долаш хӀама да.
Ерригача Россе цу олимпаданна юкъе дакъа лоацаш хургда 6,5 миллион бер.
Ишколе берашта тӀадехка декхараш кхаьчадеце а, кхыча Ӏилмашта гӀалгӀай мотт юкъебихьабеце а, хьехархоша ишколера бӀал чакхбоаккхаш къахьийгар. Цар шоаш оттадир берашта дала декхараш, болх чакхбаьккхар, котбаьннараш белгалбир. Цу тайпара болх дӀабихьар Сурхо тӀарча 9 шера дешача ишколе а. Котдаьннача берашта сийлен грамоташ лургья, царна шоай наьна мотт кхы а чӀоагӀагӀа безалургбар дергда.
