Хьаькъал кхолла пхьоалле
Наьсарерча лицея 30 шу дизарга
Дукха ха йисаяц Наьсарерча №ӏ йолча лицея 30 шу диза. Из хьаяьй 1996 шера маьтсела бетта 17 дийнахьа. Цу хъана ерригача насарен кхале цул дикагӏа хьалаш долаш дешара моттиг яцар, цудухьа цига деша дӏадала гӏертар шоай бераш гӏалий тӏара меттел, гонахьа ядача юрташкара а бераш. Кердача дешара моттиге яр компьютерни класс, актови хзал, хоза хьаяь хӏама дуа моттиг, спортивни зал, майдаш, стадион, дешара лаьрхӏа массадолча хьалашца ӏалашъяь классаш, цунга хьежжа хьехархой а. Цу хана денз вай республиканна а берригача мехка а накъабаргбола нах кхебеш, царна кӏоаргга ӏилмаш довзийташ хьайоагӏа лицей. Тайп-тайпарча ханашка цунна керте лаьттаб шоай гӏулакх довзаш бола говзанчаш Чопанаькъан Сергей, Бауленаькъан Муса, карарча хана цун директор я Шадажанаькъан Марем.
Лицее къахьегаш ба йоккха поалхам йола хьехархой, царех цхьабараш 15, 20, 30, 40 шераш стаж йолаш ба. Дуккхачар лелаю цӏихезача хьехархой цӏераш. Гӏалгӏай Республикан а Россе а гӏорбаьнна хьехархой ба Шадажанаькъан Бориса Марем, Мержой Яхььяй Люба, Овшанаькъан Мухьмада Сабира, Зурабанаькъан Баматгире Яха, кхыбараш. Хӏаьта директор иштта белгалъяьккхай вай мехка дезача совгӏатаца, «Карахдаьннарех» яхача орденца.
Цига дийша баьнна кагий нахи мехкарийи доккха дешараш дийша баьннаб, цхьабараш хӏанз а дешаш ба вай мехка столице Москве.
Цхьан хана «говзанча хьехам» яха урок еннай аз а цу лицея тхов кӏалха. Из яр, гӏалгӏай литературах йола 9 классе Гаьгенаькъан Гирихана кхоллама хетаяь. Дешархоша ладувгӏарга хьежача, сона мегар цар дег тӏа бода никъ лаха, Гирихан а цун кхоллам а кхы тӏа безабалийта.
Лицей тахан тоаяь, кердаяьккха я. Цун чура а тӏера а телха мел дола хӏама тоадаьд. Хетаргахьа, дешархошта паргӏата а дешарцара безам лакхбеш а да таханара лицеера хьал.
