Юххьанца шо-шоаш дешаш болча ишколе ши бӀал хиннаб цар: хьалхарбар –кийчон, шоллагӀбар – ишколе дешарашта юкъе. Яхь чакхъяккхара хьалхашка латта керттера декхараш да: дешарцара безам лакхбар, гӀалгӀай литературах ховш дола хӀама шердар. Цул совгӀа, бераша шоай наьна мотт шаьрбергба, гӀалгӀай поэтий кхолламаш довзаргда, цунга гӀолла цхьабараш безабенна, даимленна цар дегашка биса тарлу.

Из республикан яхь я. Кхален яхье котбаьннараш дӀахо къовсалургба. Оаха хьалха хоам баь ма хиллара, цу самукъанеча моттига юкъе дакъа лаца йиш йолаш да 5-10 классашка дешаш дола бераш.

Наьсарен яхь чакхйоаккхаш, из нийса дӀаяхьарга хьожаш хургба хьалххе а хержа кхелахой, дешара урхаллен болхлой, къаьстта яхьах бола бехктокхам дешара урхаллен керттерча болхлочоа Овшанаькъан Хадижата тӀачӀоагӀбаьб.

Дешархой бокъо я моллагӀа шоашта хоза хета гӀалгӀай оазархоша язъяь байт еша. Кхелахоша теркалдергда байт, оаз тоаеш, хоза ешар.