УнахцӀено – лораде деза керттердар
Наха гӀо де кийча йола лор
Вай республике бӀаьш лораш ба, хӀара дийнахьа наьха унахцӀенон ха тӀа латташ. Дукха ха йоацаш, Магасерча стадиона юхегӀолла тӀехвоалаш дийшар аз хьалтеха доахка: «Мехка керттера рузкъа – халкъа унахцӀено» яха дешаш. Из даьсса, хозахета аьнна хӀама дац. Вай зӀамигача республике шергара шерга дукхагӀа хулаш йоагӀа наха тайп-тайпара дарбаш деш йола моттигаш. Цар чу латтача чоалханеча гӀирсаш тӀа болх беш ба йоккха говзал йола лораш. Со зӀамига волча хана, лор воагӀа, аьлча; бераш кхераделе коа чулелхар, цунах къехкаш. ХӀанз лораш а медйижарий а къахьегаш ба царна юкъе, уж дешаш болча ишколашка.
Цу лостамагӀа юртарча наьха хьалаш, таронаш шахьарашка бахача наьхачарна нийсса дӀаотташ латт. Дуккхача юрташка я больницаш, амбулатореш, царех цхьаяраш курорта нийса лархӀа мегаргйолаш а я. Масала, ЖӀайрахьа хьалъяьча дарбанче нийсвенна саг, курорте вахачунца нийсве йиш я. ХӀаьта из вай эггара гаьнагӀара лоаман кхале я.
Дуккхача наьха хьашташ кхоачашдеш хьабоагӀача наха юкъе ба Сурхо тӀара лораш а. Ткъо шу гаргга ха я цигарча амбулаторе къахьегаш Налганаькъан Хадижа йола. Из терапевт я. Еррига юрт йийкъа я 5 даькъа, хӀара даькъ тӀарча наьха гӀулакхаш кхоачашдеш цхьацца терапевт я. Царех цаӀ я Хадижа а. Сона из дагайоагӀа хӀетта дийша яьнна, геттара къона йиӀиг (хӀанз а мичай из къаьна) йолча хана денз. Наьсарера юрта йодача автобуса тӀа хайя, геттара Ӏуйрийна ший балха тӀа хургйолаш, йодаш хулар из, ара латтар мел цӀайза, шийла Ӏа хиларах. Иштта дар хӀара доагӀача дийнахьа.
Тайп-тайпара лазараш долаш нах ба из хьажа езараш, царна юкъе ба пехкашта, дега, ченна, иштта кхыдола цамагараш дараш. Ший балхах лоархӀаеш, амбулаторе кулгалхоша лоархӀаш я Хадижа, лора гӀулакх довзаш а дизза кхоачашдеш а хиларах. Къаьстта а лорага товш йола оамал я цун: безаме йистхила ховш, эхь-эздел долаш, унахочун лоткъама фийла хилар. Цу тайпарча лорий кара вай могашал хилча; вай цӀаккха а эшам болаш хургдац аьнна хет сона, лелалуш дола денош, хьинар кӀезигденна, вахарцара безам лаьгӀбенна.
