Царна юкъе гӀалгӀай мотт, литература доацаш дайна, аз телефон техар Наьсарен кхален наьна мотт, литература хьехача хьехархой цхьанкхетара кулгалхочунга Джименаькъан Лейлайга. Цо яхачох, дукха Ӏилмаш довзар лоаццача хана тохкаш хилча, берашта цар дикка Ӏоткъам бе тарлундаь, наджгоанцхой бетта чакхъяккха лаьрхӀад наьна меттах, литературах йола олимпиада. Из, цо яхачох, ТӀой-Юртарча № 4 йолча ишколе хила мегаш я.

Сога хаьттача-м, наьна метта сий деш хилча, цунгара дӀайолае езар еррига олимпиада, наьна мотт эггара тӀехьа а къаьстта а ца оттабеш. Хьалха хӀара шера хулаш хинна эказаменаш наьна меттагара дӀайолайора. ХӀанз цу метта хӀама лоархӀаме цахетараш нийсбеннаб вай Ӏилман а дешара а министерстве. Вешта, цу чу-м ва а вац наьна меттаца беш бола болх лерттӀа дӀабахьа ховргдола саг.

Олимпиаде тайп-тайпарча Ӏилмаех шоашта фу хов хьожаш, къовсамашка дакъа лоацаш да дуккхача юрташкара бераш. Сурхо тӀара баьхкача дешархошка, Исмейланаькъан Ӏайнайга, Эсамарзанаькъан Тамарайга, Муцолганаькъан Хадега хаьттар аз, дуккхача яхьашка дакъа лоацаш хинна уж цхьанна Ӏилмах котбаьннабий, аьнна. ХӀанз а хьааьннадац шоашка, яхаш, дийцар дешархоша. Бакъда бераш сатувсаш-м да, цхьацца толамаш шоаш даьха хиларга. Масала, 7-ча классе дешаш волча Тоачанаькъан Ӏаддала дувц, ше математиках дукхагӀа мел дола декхараш нийса кхоачашдир, яхаш. Иштта уйла йолаш ба кхыча юрташкара баьхка дуккха дешархой а. Бакъда тӀеххьара дош кхелахошка да, цар баьр мара мах бац. Олимпиада чакхъяьлча, ховргда вайна, Ӏилман тӀагӀолла яьржача яхьашка толамаш даьхараш малаш ба. Из ха дукха ха йисаяц.

ТӀехьа тӀайоагӀача хана, вай Ӏилмани дешареи министерствос наьна меттах, литературах йола олимпиада эггара хьалха оттайича бакъахьа хетар сона. Цул совгӀа, гаьна уллача юрта а ца еш, массаболча дешархошта тӀабоагӀаш аттагӀа хургдолча моттиге из йича а нийсагӀа хургдар аьнна хеталу.