Наьна мотт лорабаь саг
Оздой Ӏадразкъий ИбрахӀима 120 шу дизарга
Цхьа кӀира совгӀа ха мара йисаяц, гӀалгӀай гӀорваьннача Ӏилманхочун, наьна мотт лорабеш дерригача ший вахарах чакхваьннача Оздой ИбрахӀима 120 шу диза. Ишколе деша мел даьгӀача, гӀалгӀай мотт Ӏомабеш мел хиннача берашта дика йовзаш я из цӀи, хӀана аьлча тахан а 6-9 класcашка багӀача дешархоша шоай къаман мотт цун книжкашка гӀолла Ӏомабу. Ӏадразкъий ИбрахӀим ваь хиннав 1905 шера тов бетта 14-ча дийнахьа Пхьилекъонгий-Юрта.
Ше ишколе-интернате дийша ваьлча, из дӀахо а Ӏилманца къахьега ловш хул, хӀанз цо хорж Буро тӀара хьехархой техникум. Меттах дика кхеташ, цун къайленаш а хала моттигаш а гучаяха, тоае ховш вола зӀамига саг зув техникума кулгалхоша; цудухьа, дийша ваьлча, из болх бе вут техникуме хьехархо волаш. ДӀахора цун вахар дукха халонаш йолаш а, къахьегамах дизза а хул. Хетаргахьа, эггара йоккхагӀа йола хало цунга кхаьчар, берригача мехкага а санна, 1941-1945 шерашка хиннача тӀема хана. ИбрахӀим, ше раьза волаш, тӀем тӀа вода. Цига лачара а воал, цу хьакъехьа ший книжка тӀа яздаьд нохчий йоазонхочо Ошаев Халида. Бакъда из дийна вус, амма фашистий тутмакх хилар цох цул тӀехьагӀа.
Ӏадразкъий ИбрахӀим, со университете деша вагӀача хана, волаш вар; цул совгӀа, тха паччахьалкхен экзамена кхелахой председатель а вар. Цуннеи филологически Ӏилмай доктора Оздой Фирюзайнеи яла йийзар са наьна меттах йола экзамен. Шин профессора пхиъ оттаеш чакхъяьлар из.
Ӏадразкъий ИбрахӀима дукха къахьийгад вай ишколера дешара книжкаш кхоллаш, уж арадоахаш. Ишколе наьна мотт Ӏомабеча 6-9 классашкарча книжкаел совгӀа цо 1941 шера кийчдаь, арадаьккха хиннад гӀалгӀай эггара хьалхара орфографически дошлорг. 2003 шера цун воӀа Рамиса оттадаь керда орфографически дошлорг дас оттадаь хинначун кӀийлен тӀа оттадаьд, цох пайда эцаш. 1980 шера «Эрсий мотт» яхача Москверча издательстве арадаьнна «Эрсий-гӀалгӀай дошлорг» цо оттадаь да. ДагадоагӀа, Шолжа-ГӀалий тӀарча хьехархой училищен дешархоша а къаман мотт цо оттадаьча книжка тӀара Ӏомабора. Из лаьрххӀа цу дешара моттига оттадаь дар.
Эггара хьалха хьехархой говзал лакхъю институт (1938) шера духхьашха хьайийллар хиннав ИбрахӀим. Иштта Нохч-ГӀалгӀай Ӏилма-тохкама института метта сектора керте лаьттар из тӀехьарча хана. Вай мехкахочо дукха Ӏилман балхаш кхелла хиннад.
Тайп-тайпара тӀема а къахьегама совгӀаташ деннадар цунна: Сийлахь-боккхача Даьймехка тӀема ӀӀ дозал дола орден, «Хьаьнала къахьегарах» яха майдилг, «КарагӀдаьннарех» яха моттигера орден.
Ӏадразкъий ИбрахӀим кхелхав 1986 шера.
