Тептаро хоастабаьб вай мохк
«Россера дешар» яхача журнала аргӀанара номер
Вай республике кхаьчай «Россе дешар» яхача тептара аргӀанара номер (2024 шу, №2). Из (журнал) шера шозза мара арадоалаш дац, цун редакци я Дона-тӀарча-Ростове, хӀаьта викалаш ба Москве, Петербурге, Казане. ДӀаяхача бӀаьсти цун журналисташ баьхка хилар вай республике, уж вӀашагӀкхийтар моттигерча дешара министраца Цхьорой Ахьмад-Башираца, тӀехьарча шерашка хьалъяьча кердача ишколай, берий бешамий кулгалхошца.
«ДикагӀа йола поалхам» яхача керта кӀалха кепа теха да Жуков Никитас даь йоазув. Цу тӀа белгалдаьккхад, мел дукха эргалонаш хиннай вай дешарца, ишколаш а берий бешамаш а хьалъярца. Мехкадас Келаматанаькъан Махьмуд-Ӏаьлас даь къамаьл а юкъедихьад цу йоазонна. Цо яхачох, берий кхоане дика хилийта гӀерташ, наха къахьега моттигаш кхоллаш дӀабихьа болх ба из.
Дувцача йоазон тӀа белгалъяьхай республике хьалъяь керда ишколаш: СОШ №10 (Шолже), СОШ № 11 (Инаркъе), СОШ № 5 (ГӀажарий-Юрт), СОШ № 6 (Эккажкъонгий-Юрт), Сурхо тӀара ООШ, кхыйола ишколаш, берий бешамаш.
Йоазон тӀа белгал ма даккхара, ер шу чакхдалале хьаелла езаш я 5 керда ишкол, цар чу деша таро хургья 2430 дешархочун, 320 бер гӀоргда укх шера болх бе йолалуча 2 берий беша. Тептаро ма аллара, республике болх беш я берий говзал лакхъеш йола «Технопаркаш», ӀT-клубаш, берашца болх беча наха йола «Моттигера хьехархо» яха программа, кхыдараш. Дешар тоадеш, Ӏомадечун боарм лакхбеш хьавоагӀа республике 7615 хьехархо.
Тептаро берригача мехка дӀадовзийтаргда цу лостамагӀа ГӀалгӀай республике хинна хувцамаш.
