Сомаш кхачарга сатувсаш, уж лорабеш, гаьнашка урагIахьежаш уж кхеста дукха ха яр. ЧIоагIа дега Iоткъам беш да, боалаш баха хьал ца кхоачаш йола гаьна ткъовро, Iосоттаяь, къарссенцахьа кагьяь, га Iолохеяьккха, сом баа оттар. Из ийрча хIама, тахан берашта юкъе даьржа да. Хийла хоз, карта йисте ягIача гаьна ткъовро кагьяь, боалаш буаш доахкача берашка беша дай даггара лувш. ХIаьта, берашта, ахкан ха хьаэттача, дика ховш хул, малагIча ураме, хьан беша малагIча сома га ягIа.

Гаьнаш-м, дукхагIболча наха, Даьла духьа аьле, карта йистегIолла дIайогI, цу тIара сом берашка баийта, маьл хилийта, бакъда чIоагIа хало цу наха еш да, сагIийна аьнна дIаегIа гаьнаш, вIалла къа ца хеташ, кагьеш хилар. ЦIагIарча даьша, ноаноша хьехар лоаттаде деза берашта, из гIулакх чIоагIа ийрча, Далла хьалхашка геттара во, уж гаьнаш йолча наьха дог дохадеш долга хьалхадоахаш. Са а доаллаш, дийна йолаш, саг санна йоккха хинна, тоаенна дIаотта езаш из га а йолга дувца деза берашка. Дуккхаза хезад сона, карта йистегIолла, бераша буалба укх тIара сом аьнна, гаьнаш дIаегIача наха из лоткъадеш....

Гуйран ха хьаэтта, тIера гIаьнаш Iотайса, шоаш ма ярра хьагуш, гаьнаш латтача хана, зувш хул, кагьенна, йокъаенна Iояда цар ткъоврош. Дог доха хIама да-кх из, духхьал бIарахьежача а, хIаьта гаьнаш дIаегIарашта мел хала хила деза из?.. Из болх лелабераш хIанз дIаболабеннаб шоай «чарахьал» де. ЗIамига волаш дIадувцаш дола хIама, беро дIаэц, лард хиле дIаотт. Теркалде деза вай из гIулакх! ХIара га, цу тIара сом, Дала вайх къахетам баь, хьахулийташ болга, Даьла деррига зувш а гуш а волга дIадувца деза берашка. АллахIа къахетамца ма дий вай вахарера деррига дикаш! Из къахетам боацаш ма дусалда вай! 

Йоазанхочун да Ахьмади йоI Данаи

Тимура нана Аьлданаькъан Марем