Берашта деша хӏама да
«Селаӏада» аргӏанара номераш араяьннай
Ессентуки яхача шахьар тӏа кепа теха, цӏаенай «Селаӏад» журнала аргӏанара 7, 8-гӏа ши номер. Из деша йиш йолаш ва вай мехкара 2 эзар саг, иштта я цун тираж. Из дийша ӏац духхьал бераш, цунца сакъердалуш хул боккхагӏбараш а. Цунга гӏолла довза йиш я вай берий литература дегӏа мишта ух, малагӏа керда цӏераш юкъеяьхкай вай къаман йоазонхошта. Боккхагӏчарна къаьстта езаенна оагӏув я «Гӏалгӏай сийдола нах» яхар.
Ховш ма хиллара, журнала кепа еттача йоазошта юкъе да тайп-тайпарча жанрех даь балхаш. Царех я байташ, дувцараш, фаьлгаш, кӏоанолгаш, кроссвордаш, кицаш, ховли-довзалеш, кхыметтел зӏамига пьесаш. Аргӏанарча укх шин номер тӏара берий еша таро хургья Хьоашаланаькъан ӏаьлий, Дударанаькъан Урусхана, Хамхой Жимсаре, Хамхой Дауда байташ. «Берий кхоллам» яхача рубриканна кӏалха кепа техай Сурхо тӏарча ООШ дешархой Булгучанаькъан Аминай, Тоачанаькъан Сумаяй, Хучбаранаькъан Ровзата байташта. Цига го йиш я «Дийлла дуне» яхача дешара центрерча берий Лисицина Лиорай, ӏалбаканаькъан Зоврбика, Мутаӏаланаькъан Камилай, Ховтанаькъан Мухьаммада даьхка сурташ.
Берашта езаеннарех я Эзопа кӏоанолгаш, кроссворд, ховли-довзалеш тӏадола оагӏонаш. Боккхагӏчарна а зӏамагӏчарна а цхьатарра езарех я «Гӏалгӏай сийдола нах» яха рубрика. Укх шин номер тӏара берашта вовзаргва Кӏуренаькъан Элберда Йоакъапи Оздой Гӏуме Ювнази. Шаккха журнал хозача, бе-беча басарашца даьхкача сурташца кийчдаьд суртанча йолча Гӏудантанаькъан Дукхеша.
Журналаш уж дешаш болча нахага ханнахьа дӏакхачийтар лоархӏаме да. Уж дукха ца гоадеш ишколашкарча библиотекашка хургдола хӏама де декхарийла ба кхаленашкарча дешара урхаллений болхлой, царга дехар хургдар са. Уж журналаш берашка ханнахьа дӏакхачарга хьежжа вай къаман багахбувцам, литература довзаш хургда бераш. Цул совгӏа, дешара а йоазонна а сихагӏа шаьрлургда. Тӏаккха вай саготде дезаргдац; гӏалгӏай берашта наьна мотт хац, яхаш.
