Царгий лораш кийчбу пхьоалле
Шолже хьайийллар стоматологически институт
Укх деношка Шолже хьайийллар Гӏалгӏай мехка цӏаккха хиннайоаца стоматологически институт. Хьалха вай мехкара кагирхой, арахьа дӏа а ухаш, хала лелар из говзал ӏомае гӏерташ. Хӏанз уж а цар дай-ноаной а паргӏата хургба, хӏана аьлча шоай цӏагӏа боллаше, шоай республикера ара ца боалаш, дийша царгий лораш хила йиш я царех. Шолже институт хьаелла гӏерташ дукхача хана денз къахьийгар ва Ӏарчакханаькъан Тархана Ахьмад. Парламента спикера гӏонча йолча Хьаьшанаькъан Азас ма аллара, кӏаьд а ца луш, кӏорда а ца деш, ше лийрхӏар чакхдаьккхад цо.
Керда хьайийллача институте хӏанзарчоа цхьа факультет – стоматологически – мара хургьяц. Цига дийша баьннача кагийча наьха а мехкарий а дипломаш тӏа дӏаязъяь хургья «стоматолог» яха балха говзал. Укх шера эггара хьалха цига деша эттараш верригаш 200 саг ва. Институт дикка дӏаяйзача, цига деша аха тарлу гонахьарча мехкашка баха кагирхой.
Институте болх беш хургба шоай гӏулакх дика довзаш, ӏилманхой цӏераш йола говзанчаш. Масала, института ректор я экономически ӏилмай кандидат Тоачанаькъан Къурейша Лида, дешарца дувзаденнача дешаех йола проректор я Гӏалгӏай Республикан юристий Ассоциаце доакъашхо Дугенаькъан Мусай Хьава, кхетама балхах йола проректор – физико-математически ӏилмай кандидат Коазой Джабраила Фира, ӏилман балхах йола проректор – экономически ӏилмай кандидат Гойганаькъан Гӏапура Макка, факультета декан я медицински ӏилмай кандидат Ӏарчакханаькъан Сайт-Салама Зарема. Интситуте хургья хоамий отдел а, цунна керте латтаргва Солтамаканаькъан Марата Ахьмад.
Хьагуча тайпара, институте къахьегаргдараш ӏилман даькъ тӏа цхьацца хӏама карагӏдаьнна нах ба. Хӏаьта институт хьайийлла Тархана Ахьмад цу тайпарча дешара моттигашкара болх дика бовзаш ва, хӏана аьлча йӏаьххача хана цу лостамагӏа болх беча колледже къахьегаш хиннав из.
Институте хьехаш бола нах а йоккха говзал йолаш хургба аьнна хет сона, хӏана аьлча вай республике ба ӏилман даькъе йоккхий цӏераш лелаеш бола нах, царна юкъе кӏезига бац дика лораш а.
Лоацца йоаккхаш йола цун цӏи ИСИ (Ингушский стоматологически институт) хургья.
Институт хьаеллача ена хилар Гӏалгӏай парламента кулгалхочун гӏонча Хьаьшанаькъан Аза. Цо дакъа лаьцар институт хьаеллача, ше къамаьл деш, ловца баьккхар кердача дешара моттига а цун болхлошта а. Тхоай аргӏагӏа оаха а (газета болхлоша), дика а хеташ, даькъалабувц кердача института хьехархой а дешархой а, цар балха тӏа а дешар тӏа а толамаш хиларга сатувсаш.
