ХӀанзалца бокъонца бӀаьсти йоагӀаш санна къаьга, йӀайха лаьттаяле а ара, хӀанз гуйран тӀехьарча бетта бийсаша хьагойт, Ӏан денош гаргагӀертилга. Гуйран ха хьаэттача, хӀара шера кхайкарал ду вай, мехка вахара бувзамашка гӀолла, доал доацаш лелача мискача дийнатий уйла е, шоашта могаш дола гӀо де хьажа, яхаш. Вай республике массехк моттиг я, ара лелача цискашта гӀо деш. Даьла духьа цу мискача дийнаташта оарцагӀбаьнна лелараша чӀоагӀа кхайкарал ду, теркал ца деш ма дита уж, шелал тӀагӀертача ара кӀалдус уж, яхаш.

ХӀанз вай мехка царна лаьрхӀа цӀалгаш хьадеш моттиг я, хӀаьта цхьадола цӀалгаш массехк гӀатах латташ а да. ХӀара сага ший коа е кхычахьа, уж миска дийнаташ лелача Ӏооттадича, из мел латт цох маьл дӀаухаргбар цу сага. Уйла ел тӀаккха, доккха дика деций из?! Сага хулаш мел дола шелалцара лазараш хул цискашта а, сага озар санна Ӏазап оз цар а, лазаро лаьцача. Вайна Дала тӀадиллад, царца къахетаме хила, аьнна! Хийла, базара коа тӀа, кхыйолча аренашка наха чувхадеш, хобаделе, кӀалдисаро готтадаь Ӏехаш лела уж мискаш бӀаргадайча, дог лазадоал. 

Кхоана Дала тхога, адамашка, хоаттаргдолаш хӀама да-кх ер аьле хеталу… Цискашта лаьрхӀа долча цӀалгех доаккхар дукха ахча дац, ма дарра аьлча, саг къевала, эшам хила хӀама дац из. Из керте лаьца, хӀаравар сомавоаларе, Дала диканца бекхам ца беш дутаргдацар вай. Аьнна ма дий, Даьла духьа даь цхьаккха дика дов йиш йолаш дац! Дала цул дикагӀа долча хӀаманца дог хьоастаргда цун. Нах вӀашагӀ мел кхийттача, массе моттигашка дӀа-хьа доаржаде вай из гӀулакх! ДукхагӀа дувцаш хилча, дикагӀа дӀаэцаргдар, аьнна, хет. Хьамсара бусалба нах, оарцагӀадовла вай цу мискача хьайбай гӀулакха! Тахан вай даь дикаш кхоана бӀаргагургда вайна… Дийнаташца къахетаме хилар - вай хӀаране декхар ма дий!