Сосаркъанаькъан Аьсет яьяр 1973 шера тушола бетта 10-ча дийнахьа МагӀалбика кхален СоагӀапча. 1989 шера, ишкол яьккхачул тӀехьагӀа, цо дукха а тайп-тайпара а дешараш дийшадар: Нохч-ГӀалгӀай паччахьалкхен университета филологически факультете актёрий говзал Ӏомаяьяр; культурани искусствони болхлой кийчбеча Мосверча Академе яьгӀаяр, цига цунна еннаяр «Драма режиссёр» яха говзал; культуран оагӀонаш Ӏомаеш дийшадар Ростоверча паччахьалкхен университете. Аьсета болх баь моттигаш а тайп-тайпара яр. Москверча М.Н. Ермоловай цӀерагӀча театра режиссёра гӀонча йолаш болх баьбар цо; къахьийгадар Къилбаседа Кавказа Паччахьалкхен технически университета Наьсарерча филиала кхетама балхах йола проректор йолаш; театра актриса, литературан даькъа кулгалхо йолаш, и. кх. дӀ.

Хоза уйлаш, кхоачашде лерхӀаш дукха дика хӀамаш дагахьа долаш яьхар из ший тӀеххьарча деношка. Цо лерхӀар ше мел даь йоазош тӀадола книжка арадаккха, иштта из лаьрхӀа яр хӀанз ХьажцӀа болхача нахаца цига яха. Цу тайпара уйла хилар а, цунна маьл хургболаш хӀама дар аьнна хет сона. Аьсет боккхача дезале кхийнаяр, цунна дагалаьттараш вежараша а йижараша а кхоачашдергда аьнна хет сона.

Наха дукха езаш, царца товш а цар мотт ховш а яьхар Хьажбийкара Аьсет. Цо эггара тӀехьа сайга аьнна дешаш дийна мел волча хана дицлургдац сона: «Ӏа са деладаь дог, Дала деладолда хьа!» - аьлар цо.

Ший гаргарча наха а вай дерригача къаманна а эшаш саг яр Аьсет. Каст-каста из дагаухаргья вайна, йовзаш хиннарашта цӀаккха йицлургьяц.

Дала къахетам болба цох, Дала гешт долда цунна, йийрза моттиг даькъала йойла!