Дика дешараш гуш хул
Сурхо тӀарча дешархошта совгӀаташ дӀаделар
Укх деношка (8 июне) Сурхо тӀарча ГБОУ СОШ № 1 йолча школан актови зале дукха нах вӀашагӀкхийтар. Цига безбир дешара шу дика чакхдаьккхача юртарча шин школан дешархой, шоллагӀъяр ийс шера дешар яр. 2015 шера денз бераш дика дешара оарцагӀдоахаш йола яхь юртарча йиъэ школе дӀакхайкаяьй Хучбаров Ӏадалмажита Уматгире пхе воӀа: Адама, Илеза, Рамзана, ИсмаӀала, Ислама. Беррига вежарий Москвера Н. Э Баумана цӀерагӀа МГТУ яьккха ба, цар караерзаяь балха говзал — инженер бизнеса и менежмент. Йиъ этапа йийкъа яр дешархошта юкъера яхь, вешта аьлча хӀара четверте цар мишта дийшад хьожаш хиннаб хьехархой а яхьан дай а.
Нагахьа санна 100 процент пхиаш йолаш дийша ваьнна кӀаьнк е йиӀиг яле, цунна хьалхарча лагӀах дола диплом, кубок, ахчан преми лора. ШоллагӀча лагӀанна чубоагӀар 90 процент пхиаш а йолаш, цхьаккха кхоъ йоацараш, царна а дипломаш, медалаш, ахчан совгӀаташ делар. Юххера, кхоалагӀча лагӀан тӀа дӀанийслураш бар 75 процент пхиаш а йолаш, цхьа кхоъ йоацаш дешара шу чакхдаьккхараш.
Лакхе хьоахаяьча шин школера совгӀаташца белгалваьккхар 31 саг. Царна юкъе къаьстта дика дешаш хьабаьхкараш а, яхье котбаьннараш а бар Нальгиева София (7 класс), Измайлова Фатима (7 класс), Богатырева ПаьтӀамат, Евлоева Мадина, Муцольгова Мадина, Тумгоева Зульфия, Богатырёва Марет (11 класс), кхыбараш. Уж берригаш юртарча № 1 йолча школера бар. Иштта ийс шера дешача школера геттара дика хьокхамаш гойташ чакхбаьннача Измайлова Линайна а Муцольгова Фатимайна а кхычарна а делар толашагӀдола совгӀаташ. Вежараша совгӀаташ дир цхьаццаболча хьехархошта а. Масала, царех вар Аушев Хамбора Шамал, Измайлов Мухьмада Аза.
ВӀашагӀкхетаре къамаьл дир Хучбаров Уматгире воккхагӀволча воӀа Адама. Шоашта из гӀулакх юртарча берашка дика дешийтар духьа дагадехад, аьлар цо. Тахан цар дика деше, уж юрта а мехка накъабоалаш хьалкхувргба, вахаре йоаггӀаш йола моттиг хьа а лоацаш. Иштта кхетачене къамаьлаш дир шинна школан директораша: Мальсагов Рашида Моте, Хидриев Мухтара Любас, дешархой ноаноша, бераша шоаш.
Ювцаш йолча яхье котвала безам болаш вола дешархо тӀехдика дешарал совгӀа, республикански олимпиадашка е кхыча къовсамашка дакъа лаьца хила везар. Цул совгӀа, доклад е реферат язъяь а, из школерча хьехархошта йовзийта а хила везар. БӀарчча хьаийцача, дешара а хьаькъала а доккха цӀай хилар цу вӀашагӀкхетарах. ДӀа-юха къастале, цун доакъашхоша сурташ даьхар.
