Малав терминалаш йохаер?
Телефона тӀа ахча Ӏодилла моттиг яц…
Цкъа ше телевидене къамаьл деш, вай республикан кулгалхочо Келаматанаькъан Махьмуд-Ӏаьлас аьнна дешаш дицлуц сона: «… Хьадаьр лораде деза». Нийса аьнна дешаш дар уж, нагахьа санна массанена дӀахозаре. Дукха ба иттаза аьлча а уж дӀахозаргдоацараш, вешта аьлча, дӀахаза безам боацараш. Магасе бахача нахага а, кхычахьа бахарашка санна, телефонаш я хӀара цӀагӀа. Хьалха атта дар, ахча ӀотӀадилла терминалаш латтар кхоъ-йиъ, эггара дукхагӀа нах тӀалаттача моттигашка. ХӀанз латтий? Цу хаттара жоп луш, дикка чов хул сона, хӀана аьлча уж ерригаш йохаяьй е шоаш еха латт, царга хьожаш, тоаеш, лораеш саг вац.
Цудухьа телефона тӀа ахча ӀотӀадилла Наьсаре ваха везаш хул. ХӀанад из? Хьадаь, латташ дар лора ца дендаь да-кх. Магасерча «Для гурманов» яхача тика хьалхашка, тӀа кхоале е йолаш, лаьтта аппарат оззаяь хьа а яьккха чура дӀайихьай, магӀарча «Чистюля» яхача тика наӀарга йоаллар, скотч дийхка дӀачӀоагӀъяьяле а эгаш латт, пӀелг мел тоӀабеча хана. Болх беш яц. ЭгӀахьарча Озанаькъан Салмана урам тӀарча «Бытовой хими» яхача тиканна наӀар тӀа йоаллачун кизга тӀа пӀелгаца сурташ дийхка вахав цаӀ, сов дукха цу тӀа дом уллаш…
ХӀана лоаттаю уж тоа ца еш, мича бахаб вай бувзамхой? Сел хьурмат доацаш хӀана леладу цу тайпара, наьха вахар аттача доаккхаш дола гӀирсаш? Из аз дӀадийцача, сона вовзача цхьан лакхарча дарже болх беш хиннача эпсара аьлар:
- ХӀама де дезац, царна юххе уж йохаер малав гойтаргйола камераш дӀайохка мара.
Дукха хала де дезаш хӀама а дац из-м. Ӏаьдала зе дераш, нах кхестабераш, баха ца бутараш хьалувца а кхолханеца шоаш даь зе меттаоттадайта а деза. Из, сога хаьттача, нийсхо йолаш бола никъ ба.
