Вордингаш а хахка ха деза
Вай вахара юкъеяьхкача самокатех лаьца
Вай мехка йоккхача шахьарашка лелаеш йола электросамокаташ кхаьчай вай республике а. Масала, Магасерча Заьзганаькъан Идриса, Кулиев Кайсына урамаш тӀа дукха го йиш я уж. Уж эшаш а накъаяргйолаш а транспорт я, аьнна, хет сона; столице бахача наха. Шахьар шерлуш латт, цхьан йистера вокх йисте гӀаш водаш хилча, кӀезигагӀа дале ах сахьат доаде деза. Цхьайолча хана сиха дӀакхача везаш гӀулакх хилча, е гош лазаш хилча, укхаза гӀо дергда аьнна хет сона самокаташа. Бакъда хӀанзарчоа уж дукха хехкаш е царца наькъа болхаш нах гуш хилац Магасе. дукхагӀа царца лелараш бераш да: йиӀигаш а кӀаьнкаш а. Боккхийбараш наггахьа а гуш хилац. Хетаргахьа, из дувзаденна хила мег цхьачарна цу самокатаца мишта лела веза, из дӀайолалургйолаш фу де деза цахар бахьан долаш.
Кулиев Кайсына урам тӀа «Забава» яхача тиканна юххе латта самокаташ хахка кийчлуш ба кхувш боагӀа кӀаьнкаши йиӀигаши. Царца къамаьл де лаьрхӀар аз:
- Масса шу даьннад хьа? – хетт аз царех цхьаннега.
- 13 шу даьннад.
- ЦӀи миштай хьа?
- Со Эрселганаькъан Асхьаб ва.
- Каст-каста хехкий Ӏа самокат?
- Шин дийнахьа цкъа.
- Сакъердама хехк Ӏа, е цхьаннахьа гӀулакха, тика тӀа ух хьо цунца?
- Тикаш-м тхона юхе я. Саготалла а новкъостий Ӏомабеш а хехк аз.
- Самокат дӀайолаялийта цхьацца хӀама де ма дезий. Фу де деза хьадувца ховргдарий хьона?
- Ховргдар, - йоах Асхьаба.
- Хьадувцал хӀаьта.
- Юххьанца Google Pay яхача даькъера хьалаха еза МТС Юрент, из хьачуяккха еза. ТӀаккха регистраци е еза; хьай телефон, цӀи, тайпан цӀи Ӏочуязъеш. Цул тӀехьагӀа цунах дӀахотта деза хьай самокатах ахча дӀатергдола карта. Юхедуллар тӀа (приложени) уж самокаташ гуш хургья. Уж йолча хьавена, цар зарядка миштай а хьежа, юхедулларцара хьай самоката QR-код хьачуяккха еза. ТӀаккха гуш хургья цун зарядка мел я а тарифаш а. Тарифаш кхаь тайпара хул: цхьан сахьата; минуташта, зарядка кхоачаяллалца. Зарядка кӀезигагӀа мел я кӀезигагӀа дода ахча, минуташка хьежжа мах луш хуле, цхьан минутах 5, 5 сом дех. Царех хьайна товш йола тариф хорж Ӏа. Нагахьа санна хьа карта тӀа 300 сом деце, самокат хахка вӀаштӀехьадаргдац.
Асхьаба дувцачох, дӀатӀахайна, ворда санна дӀалалла йиш йолаш яц самокат. Цу гӀулакха интернет еза, ахча тӀадола карта деза. ГӀалат доацаш, дӀадеха йоазош де а декхараш кхоачашде а деза. Уж хӀамаш хӀанз а дуккхачарна хац аьнна хет сона, уж дайза баьлча, кердача транспортаца лелаш боккхагӀбараш а хургба аьнна хет.
