Вахара наькъа юкъе
Мартазанаькъан Мусай 50 шу дизад
Укх деношка (маьтсела бетта 10-ча дийнахьа) нийсса 50 шу дизад Мартазанаькъан Яхььяй Мусай (Тимура). Цу ханага кхаьчача, новкъа юхасаца, юхахьажа безам болаш хул, ах бӀаь шера вахаш фу де вӀаштӀехьадаьннад-те са, аьнна. Уйла е безам хул дӀахо де дезаш хьалхашка латтача гӀулакхий. Мусас таханалцца хьабенача новкъа дика а доккхий а гӀулакхаш хиннад.
Цун вахарца къаьстта теркам тӀаозаш массехк моттиг я. Эггара хьалха из ва гӀалгӀай гӀорваьнна суртанча, цудухьа еннай цунна халкъа суртанча яха цӀи. Цул совгӀа, Муса ва республикан суртанчий Союза кулгалхо, Илдарха-ГӀалий тӀарча берий-суртанчий ишкола кулгалхо. Цу даькъ тӀа цо дукха къона говзанчаш, басарашца болх бе ховш бола бокъонца бола пхьараш кхебаьб. Цун сурташка хьежаш хилча, духьалъовтт тайп-тайпара вай мехка йистош, цар тӀара го йиш я лоамаш «Бешлоам», дай баьха юрташ «ГӀалаш», хьамсарча лаьттан хозал «Са мохк», иштта кхыдараш. Дукха сурташ хетадаьд Яхььяй Мусас Ӏалама, цун сурташ тӀа го йиш я хьунаш, кхыйола вайна гонахьара моттигаш. Мартазанаькъан Мусай сурташ гойташ хиннад вай республикерча а гаьнна цул арахьарча дукхача гойтамашка.
ШоллагӀа йола цун вахарера лоархӀаме моттиг я, из оазархо хилар, цун дуккхача байташа вахарах уйла яйт, царех цхьачар чулоацам айхха бувзабенна ба цо кхеллача сурташца, цхьаяраш белггала цу сурташка язъяьй цо. Муса йоазонхой Союза доакъашхо ва.
Къаьстта хьоахабе беза аьнна хет сона къона ноахал кхедеш, хьехархо волаш цо баь а хӀанз беш а бола болх. Боккха юкъара болх лелабу вай мехкахочо. Из ва ГӀалгӀай республикан Юкъарча палатан доакъашхо. Соахка вай мехка хиннача хоржамашка кийчо еш, из вар Россе президента В. В. Путина тешам бенна саг, цу лостамагӀа наха хьалхашка къамаьл деш а хоржамаш мишта дӀадолх хьожаш а хилар вай мехкахо. Цу тайпара тӀахьожама болх лелабир цо Паччахьалкхен Думе а моттигерча Халкъа Гулламе а депутаташ хоржача хана. Цул совгӀа цигарча балхашка хьожаш бола кхелахой кийчбеш а къахьийгар цо. Дакъа лоац Мусас «ЦаӀ йола Росси» яхача политически парте моттигерча даькъа балха юкъе а.
Республикерча дешара моттигашка багӀача кагирхошта хьалхашка къамаьл деш, цар хаттарашта жоп луш хул из каст-каста, дакъа лоац тайп-тайпарча телепроекташка, царех я «Культура», «Суртанчаца хӀама кхаллар».
Цун даьнна 50 шу ах вахар мара дац даггара дале а, цудухьа дӀахо цунга хьежаш да аьнна хет сона доккхий а дика а гӀулакхаш. Муса царех лоархӀавергхиларах шеко яц, ше къахьега ховш а ловш а саг волга цо дукхаза гойтад ший къаманна. Аьттув балба вай республикан хьамара къахьега.
