Цхьан дийнахьа балхара чуйодаш, кӀезига га езаш моттиг нийсъяларах, сайранга яхар со балха. Сихъенна «Осканаькъан цӀерагӀа го» оалача, газелеш сецача моттиге со кхаьчача; дукха адам дар машинаш йоацаш гулденна. Боад къовлалуш латта ха яр из, хьатӀаэзар цхьа «газель». ТӀабеттабала, ше-ше хьалхавала гӀерташ, болабелар хьежаш лаьттараш, со вӀалла хьа а ялехь, цига хьежаш лаьтта нах дӀахьалхабалийта лаьрхӀар аз. Со сихъяла безам болаш а яцар, хӀана аьлча цун тӀехьа цхьаькха «газель» йоагӀилга ховш дар.

Дукха юкъ ялалехь, цхьаькха а хьаэттар, тхо дерригаш а чухайшар цу чу. Машин хьал а йиза, доладелар тхо цӀенгахьа. Эггара хьалха аз кхетадир, цу чура хьал дика доацилга. Геттара хьамча хьадж йолаелар. Тӏаккха наха а шоайла доладир къамаьлаш.

- Даьллахьий водитель, ер машин, цӀаьхха, лоталойя, чура арадовла кхоадергдий - хьогӀ тхо?- аьлар, кхы сатоха ца могаш, бата тӀа йовлакх дилла яьгӀача, цхьан дикка ха яьннача кхалсага.

Дукха цо аьнначоа раьза воацаш юха а хьежа, водитела цхьа во човхайир из. Кхы саг йистхила а вахьанзар, кӀура хьадж дукхагӀа ена мара лаьгӀлуш а яцар.

Из цхьа саг Ӏоваккха юха мел соцача хана, геттара чӀоагӀа Ӏаьржа кӀур чубоссаш санна хеталуш, хьадж йоагӀар. Дикка унзара хьал дар этта хиннар. Иштта долхаш, Буро кӀалха кхаьчар тхо.

Из «газель» а яцар, Илдарха-Гӏалий тӀа кхаччалца мара йодаш. Са дагахьа яр, дӀакхача ма йоаллий со, сатохаргда-кх аз, яха уйла.

Шийга наха хеттачоа цхьаккха жоп ца луш, ваьгӀача водитела, машин юхаерзайир, Наьсаре бодача наькъагахьа. Нахаца дагавалар доацаш, дӀакхача доахкаш хинна тхо баьде тӀаенача бус, Наьсаре юхадугаш вар из.

- Ва водитель, дахча да Ӏа хьош дар? - аьнна, йистхилар цаӀ.

ЧубагӀараш юхасовцаргбоацилга хайча, цо аьлар:

- Шо аз кхыча газела тӀа ховшаде дугаш да.

ТӀаккха цаӀ, геттара раьза йоацаш, йолаелар:

- Ай, фуд Ӏа дувцар, тхо-м хьакхача ма доахкарий, цига Ӏодаха йиш ецарий тхо, ара бийса ма йий, тхох дош ца хетилга да ер?

Бакъда тхоца башха къамаьл де раьза воацача газелиста аьлар:

- Айса хьаийцача аз юха Ӏодоахаргда-кх шо, кхы фу ях оаш сога?

Кхы тха кара а дацар хӀама. Уйла йора оаха, ванагӀа, вай юха Наьсаренгахьа урагӀдугача юкъа, Илдарха-ГӀалий тӀа кхаьча хургдецарий вай, яхаш. Из мукъагӀа иштта хиннадацар. Ехача машинаца водитела таро хургьяцар цхьаькха рейс е, цудухьа ший довш дола ахча дар цунна дагадаьллар.

ДукхагӀча хана, газелисташ наьха кхалнахаца хьакхашта къамаьлаш де баьннаб. Саг воккха вале а зӀамига вале а, ший моттиг йовзаш хила веза.

Нагахьа санна наха юкъе болх бе араваьннавале, тешшаме а хила веза, ший метта доал деш. Нахаца тӀачувхаш, безлуш къамаьлаш ца деш; шорттига, безаме дӀа а баха, шоай балха ди дӀадахьа мегаргдацар-те цар а ...