«Во автобус-м я...»
Юкъарча транспортаца лелачар озача халонех
Массехк шу хьалха чӏоагӏа хало озар Магасе бахача наха, ханнахьа хьайоагӏаш Наьсаре йода автобус йоацаш. Ах бӏаь совгӏа керда автобус яйтай аьлча, чӏоагӏа гӏадбахабар нах, амма гӏадбахар дӏаьха хиланзар. Хьакхаьча автобусаш яр бийдолгашта йича санна. Ши саг ӏохайча, уж шоайла хьокха ца луш висацар. Из ховш бола мехкарий, цхьабола истий маӏача сага юххе ӏо ца ховшаш, уралатташ ӏокхоачар Наьсаре. Цул совгӏа, Магасерча а Эккажкъонгий-Юртарча а наха кий ӏойожа, ког ӏооттабе моттиг ца юташ, хьалъюзар уж. Из водителий бехк бацар. Автобус хьа а енна, ӏотӏаховшабаьб уж, цар декхар из дӏалаллар, нах маьрша дӏакхоачабар да. Вай мехкара дукхагӏа бола нах дегӏамаш доккха долаш, тенна ба, цудухьа царна готта да «бийдолгий» автобуса чура гӏандаш. Из бахьан долаш, каст-каста хаза йиш я: «Во автобус-м я», - яха дешаш. Иштта хозаш хул раьза боацача наьха къамаьл:
- Ма йиза я ер автобус!
- Дукха ха ма йий тхо хьежаш латта.
Водителаша оалар да:
- Тахан шиъ мара вац тхо...
- Сов чӏоагӏа хьал хӏана юз оаш ер машин? –оалараш а нийслу.
- Плана айяьй тхона чӏоагӏа, ишта а кхоачашъюлуц тхона из. Дӏачудахе, директорга дӏаала...
Дукха ха яц мархий бутт чакхбаьнна. Марха кхоабаш бола нах чубагӏа, тӏора мо йиза йола автобус, ниӏ хьайийллача, хьаж хьайоагӏаш хулар чухьара. Цу тайпарча автобусаца лелийта безар кӏеззига вай лораш, лазараш мичара доагӏа ховргдолаш, амма лорашта бала бац цу гӏулакха.
Лоацца аьлча, вай кхалнаха оалача беса: «Во автобус-м я гӏалгӏашта яйтар».
