Яндаре яха юрт йилла хиннай 1827 шера паччахьа эскара полковник хиннача Малсаганаькъан ГӀайте ГӀайрбика. ХӀанз из юрт уллаш дола лаьтта, даимленна цунна совгӀата денна хиннад, паччахьа а Даьймехка а хьалхашка дика гӀулакхаш карагӀдувларах.

Яндаре йиллале, Малсаганаькъан ГӀайрбик ваьхав хьалхагӀа ше Ӏойилла хиннача ГӀайрбик-Юрта. Хозача моттигера ший юхьиг дӀайолаеш да Яндар-хий. ГӀайрбикага хаьтта хиннад, мишта цӀи тулларгья вай юртах, аьнна. Цу хаттара жоп луш, цо аьннад: «Яндаре аргда вай укхох, укх хин цӀи а туллаш».

ГӀайрбик ваьхав 63 шера, кхелхав 1859 шера, дӀавеллав Аьлтий-Юрта, ший дай баьхача моттиге.

ГӀайрбик ший тӀема гӀулакхага хьежжа, каст-каста Петрограде ухаш а кхыметтел паччахьа тӀаэцаш а хиннав. Паччахьа, цхьацца доккха той хилча, къаьстта а белгалбаьннача эпсарашта а шийна тешаме болча наха а совгӀата лаьтташ телаш хиннад, цхьаццадола чинаш телаш, доккхийча ахчашца белгалбоахаш хиннаб. Цу тайпарча цхьан вӀашагӀкхетаре, совгӀата денна хиннад из лаьтта ГӀайрбика а.

«Ахча сона дезац, лаьтта а тоъал да сога, чин сайгардар кхоачам болаш да, - аьннад цо паччахьага, - бокъо я сона, Хьа Возал, мехкахваьккха Ӏовахьийта даь-веший воӀ Аьлтамар юха цӀенах тоха».

Паччахь чӀоагӀа тамаш еш хиннав, цхьанне ца дехача тайпара дола хӀама цо дехарах. Амма цун дехар кхоачашдаьд цо, Аьлтамар цӀа а вайта.

Цу юртарча администраце лоӀамах, цигарча цхьан урамагӀа Малсаганаькъан ГӀайрбика цӀи тиллай. Ала деза, ГӀайрбика 1827 шера даь хинна цӀа хӀанз а цига дагӀаш хиларах. Наха довзаш, цунга хьажа уж ухаш да, паччахьа эскара полковника даь цӀа.

Доккха беркат хьадаьннад ГӀайрбиках, хӀана аьлча цо йиллача юрта бах дуккхача тайпаех хьабаьнна нах: Малсаганаькъан, Йовлой, Цхьорой, ГӀоандалой, Пхьиденаькъан, Доврбиканаькъан, Хьоашаланаькъан, Султиганаькъан, иштта кхыбараш а.