Долакха-Юртарча культуран ЦӀено ший наӀараш хьайийллай 2018-ча шера. Укх фусаме бераша тайп-тайпара говзал Ӏомаю, хьехамчашца болх бу, каст-каста дӀахьош йолча яхьашка дакъа лоацаш хьабоагӀа уж.

2021 шера денз, Долакха-Юртарча культуран ЦӀен кулгал деш хьайоагӀа Доврбиканаькъан Ювсапа Хьанифа. Цун хьинарца даьр дукха да. Сийгах сийг боалаш, бӀарчча цӀера ала хинна дӀаэттаб цо беш бола болх. Из кхоана вай тӀехьенна накъадаргдар да. МоллагӀйола кхетаче чӀоагӀа раьза йолаш дӀахьу цо, иштта безаме я из ший болхлошца а. Цигара культуран цӀенче я кагирхой кхоане хьадийнъеш къахьегарех. Цудухьа, цунна тӀатайжа, ара этта хоза бӀаьстан денош наьха самукъадаккхарца дӀадахьа лаьрхӀар укхазарча кулгалхоша, говзанчаша.

Цу юкъе дакъа лоацаш вар вай республикера къона йоазанхо, культура ЦӀен методист СаьпарӀаланаькъан Микаил.

Укхаза баьхка хилар ГӀалгӀай Республикан культуран министра гӀонча Йовлой Илез, ГӀалгӀай Республикан халкъа кхоллама цIен художественни кулгалхо Абдурзакова Аьсет, Долакха-Юртарча культуран ЦӀен кулгалхо йола Манкенаькъан Зина. Безам тӀабодаш, хоза гӀулакхаш гойташ, вӀашагӀбелла болх бар из.

«Маьрша доагӀалда шо, хьамсара хьаьший! Хоза кхаъ ба-кх оаш шоашца бенар. Селлара гӀоздалар долаш, хIанз хьалха дале а, тха гаьнаш тӀара чӀонакаш яьттӀай, из оаш а зийна хургда. БӀаьсти гаргакхоачаш хилар да-кх из. Цудухьа цунна хетаергья вай ер кхетаче а», — аьнна, дӀаболабир цар шоай болх.

Дукхача вай йоазонхой байташ а дувцараш а дар вIашагIкхетара юкъедоаладаь. Иллеш доахаш, ашараш локхаш, иштта халхараш деш, шоайла хоза безам эцаш, дӀайихьар сайре.

ЦӀихезача вай къаман йоазанхой Чахкенаькъан СаӀида, Угарчанаькъан Азамт-Гире кхоллама доакъош а дайзар кхетаче. Цар дувцараш, байташ ешаш; хоза кийчо яьяр дешархоша. ДӀааьлар Коазой Тимура дешаш яздаь «Гучаяла» яха илли.

Кхетаче йистейоалаш, Йовлой Илеза, Абдурзакова Аьсета къамаьл дир, цу тайпара болх вӀашагӀбелларашта, иштта бераш дика кийчдаьча хьехархошта, цига хьабаьхкача хьаьшашта баркал оалаш.