БӀарччача ялх-ворхӀ бетта лаьтта аренаш кердаяха езаш, бешамашка лостам бе безаш, гаьнашта кӀир тоха, бесаздаьнна кӀир-басар кердадаккха дезаш хул, уж-м, вӀалла даь ца воалаш, дукха да. Ӏаьдала болхлошка диллача а ала йиш я, цар иштта цахаддаш къахьег, вай шахьарий, юртий сибаташ хувцаш, уж цӀена лоаттаеш. Цу гӀулакха лаьрххӀа болх беш ба вахара-коммунальни гӀулакха тӀара нах. Укх деношка цар дездергда, лаьрххӀа белгалдаь ЖКХ болхлой Ди.

Са таро хилар укх Магас-Шахьарерча вахара-коммунальни болхлошца къамаьл де. Цар балхара хьал вӀалла а аз терко тӀайохийташ хиннадацар хӀанзалца, сона хацар цар беш бар иштта лоархӀаме, вайна чӀоаггӀа эшаш, бехктокхаме хила везаш болх болга, бакъда цу боахама говзанчашца са хиннача къамаьло уйла хийцар са дикача оагӀорахьа. Уж-м, ден а бус а кӀаьд ца луш, хьабоагӀа вай массане юкъарча вахара моттиг лораеш, из хоза хургйола оагӀув даим теркама юкъе лоаттаеш. Цига се нийсъеннача дийнахьа, аз эггара хьалха зийнар дар, безаме коллектив хилар. Дог дӀаувш къамаьл хилар тха вахара-коммунальни боахама юрист йолча Бисайнаькъан Ахьмада Мадинайца.

Магасера ЖКХ Ӏойиллача денз, укхаза болх беш я Мадина. Цунна дика довз шоай боахамера хьал. Цудухьа хоза йистхилар долаш, кӀаьда дувцаш, хестабора цо ший балха новкъостий.

Мадинас яхачох, Ӏуйрийна бархӀ сахьат даьлча, дӀаболалу ЖКХ болхлой шоай даькъ тӀара нувхаш гулъе, уж дӀакхахьа. Из керттера балха дакъа да тха, аьлар цо. Бакъда, цул совгӀа, уж хьажа безаш ба даькъ тӀарча паччахьалкхен гӀишлош чу латтача котёлашка. Цига йӀовхал лой хар а уж болх беш дий хар а цар балха чудоагӀаш да. Из болх дӀахьораш оператораш ба. Масала, дукха больницаш а, царгий поликлиника (стоматологе) а, кхыйола моттигаш а чуйоагӀа даим ЖКХ болхлоша терко е езача гӀишлошта, хӀана аьлча, цӀаьхха, цхьан объекта чура котел е хий Ӏоухийташ, е хий хьа ца доагӀаш, из дӀох ца деш нийслойя, цунах бехктокхаме ба уж. Ховш ма хиллара, больницашкара хьал даим лорадеш хила ма дезий. Цудухьа нийса хургда, укхаза хӀаравар ше-ший даькъ тӀа хила веза, аьлча.

ЖКХ кулгалхочун декхараш кхоачашдеш волча Къоастой Хьасана ший болх дӀаболабу, болхлой шоай хила безача моттиге бий хьожаш. Коллективе барт болаш, шоайла кхеташ, наьха хьашташ кхоачашдара терко еш, хьавоагӀарех ва из, аьлар юриста Бисайнаькъан Мадинас. Болхлой а ба цунга хьежжа, шоай балха тӀа бехктокхаме. Масала, хӀара Ӏуйрийна ЖКХ болхлоша лостам бе безаш йолча моттигех я Президента болх бу цӀа, Заьзганаькъан проспект, Кадырова аллея тӀайола доазув. ДукхагӀча даькъе цига болх бераш тхьовра денз балха тӀа шаьрбенна, шоай гӀулакх лерттӀа леладе Ӏема нах ба. Царех я Ӏарпенаькъан Аза, из Казанера гӀишлон институт яьккха я. Даим ший доалахьара дакъа цӀена а лостам болаш а хилийтара тӀахьожам лоаттабу цо.

Къаьнарча болхлоех ба Султиганаькъан Макка, Албохчанаькъан Тома, Албохчанаькъан Танзила, Хоаной Лиза. Уж, ЖКХ Ӏойиллача хана денз, къахьегаш хьабоагӀарех ба.

Берригаш а укхаза болх бераш 82 саг ва. Офисе багӀараш дукха бац, пхи-ялх саг мара. ХӀаравар ший даькъ тӀа хьожаш ва. Цу юкъебоагӀа оператораш, нувхаш дӀакхухьараш, доазон тӀа лостам лоаттабераш.

Магас-Шахьара ЖКХ болх бе йолаеннай 2016 шера. Мадинас яхачох, хӀара шахьаре, районе ший къаьстта ба вахара-коммунальни боахам. Укхаза Ӏуйрийна бархӀ даьлча дӀаболалу болх; бакъда, 10 сахьат даьлча, салаӀа ха лу болхлошта, цул тӀехьагӀа делкъийна 2 сахьат даьлча, салоӀа ха я цар юха а. Иштта дале а, балха ди деррига а дӀалаьрхӀача, бархӀ сахьат да массаболча Ӏаьдала болхлой санна.

Тхо укхаза нийсдаларах, тхога гӀолла вай бахархошка цхьа хоам бир Мадинас: «Кхойтта сагага кхаччалца нах балха хьаэца моттигаш яьсса я тха, — аьлар цо. — Ма хулий болх боацаш, цӀагӀа багӀаш нах, уж тхацига хьабоагӀе, бетта 20 эзар сом а долаш, болх нийсбергба оаха. Де дезар вай лакхехьа дийцар мара дац. Раьза волчунга кхайк тхо».

Тахан вай дувцар ЖКХ болхлошта карагӀдоалар дале а, вай декхар да лостам баьча лоаттабар, цхьоагӀо йолаш, хӀаман хьурмат деш, ший доалахьардар санна Ӏаьдалдар лорадеш хилар, хӀана аьлча вай юкъара кхуврч ба Магас-Шахьар а вай республика а. Оаха, къаман юкъарча «Сердало» газета болхлоша, тхоай аргӀагӀа хьатӀадоагӀача ЖКХ денца даькъалабувц цун болхлой. Ираз-аьттув ма эшалба, шоай балхах дог лазаш, хьабоагӀача вай къахьегамхошта.