Наьсаре йиллачач денга кийчлуш я, наьха хьашташ кхоачашду моттигаш
Мах беча моттигашта, наха хӏама дуача, цхьацца базар лелаеча доазонашта гонахьа кулг тохаш, куц меттадоаладеш къахьегаш ба тахан Наьсаре. Шахьара дас Оздой Руслана тӏадилла дӏахьош болх ба из. Шахьара моттигашка лостам хила безилга белгалду мэре.
«Эггара дукхагӏа нах лелача урамашкара дӏаболабеннаб болх бе, цу юкъе да Мутаӏаланаькъан, Московски цӏерах дола урамаш. Шоаш болх беча моттигашта гонахьа асфальт ӏобуллаш, гӏишлон куц эргадоаккхаш, наькъашка лостам беш ба бизнесменаш. Хӏара моттигера хьал боаггӏача боараме тоадаь хила дезилга белгалду мэре», - йоах «Сердалога» цу моттигера бенача хоамо.
Наьсарен Ди дездеш хургба бахархой укх шера, цунга хьежжа шахьара массайолча моттигашка лостам хилар лоархӏаме да. Бахархоша чӏоагӏа лораде дезаш гӏулакх да шоаш бахача моттигий хьал цӏена, хоза, паргӏата хилийтар.
