Парка куц-сибат бахархоша шоаш хоржаргда
ГӀалгӀайчен бахархой таро я парка хургдола куц-сибат харжара юкъе дакъа лаца, из хьатӀадоагӀача шера хьалъе лерхӀ. Парк хургйола моттиг а белгалъяьй - 100,97 гектар лаьтта Наьсарен-Шахьара Магасе чувоаллача латтача 18-зза вӀаштӀара яьча гӀишлон даькъ тӀа, Эккажкъонгий-Юртара наькъаш вӀашагӀкхетача моттиге ӀотӀакхачалехь. ХӀанз укх сахьате ювца проект чӀоагӀъеш дола балхаш да дӀахьош.
Из бахьан долаш, лаьрхӀар республикан бахархошца дагавала, царна мишта гу хьажа республикан культуран, салоӀама керттера моттиг. Цудухьа ГӀалгӀайчен гӀишлошъяра министерствон сайта тӀа кхадж тасса йиш я. Наха фу хет хьожаш бола болх цу сайта тӀа дӀахьоргба, оагӀой бетта цхьоалагӀча дийнахьа денз 20 денга кхаччалца. Республикан хӀара вахархочун таро я цига оттадаьча шин куцах шийна бакъахьа хетар хьахаржа, белгалбаьча наькъах пайда эцаш.
Иштта гӀишлошъераш хьежаш ба, наха шоашта хетар тӀехьара тӀа юкъедоаладарга, цу адресах хьадайта йиш я из а, электронни почтага гӀолла. Кхадж тоссаш бу болх дӀабахьа новкъостал деш хургба лоӀамхой.
Кхадж тесса баьнначул тӀехьагӀа, проект кхоачашъяра эша кӀийле гуш хургья.
Вай республикан бахархоша дукха ха яр баьццара салоӀа моттиг цахилар дувца. Къаман парк вай мехка белгало хинна ца Ӏеш, тӀехьа тӀадоагӀача ноахалашта Ӏалам лорадара бахьан а хила деза, цул совгӀа, цо таро хулийтаргья туризм дегӀайоалае.
Из деррига дӀа а лаьрхӀа, оаха хургйолча парка куц-проект бахархошка шоашка харжийта лаьрхӀар», - аьлар мехка кулгалхочо Келаматанаькъан Махьмуд-Ӏаьлас.
Наьсар-Кертерча куран тӀара хьахержа лаьттан дакъа, ший баьццарча гаьнашца, дукхагӀа цунна доагӀаш да. ГӀишлошъяра министра Балахой Микаила белгалдир, «из хьахержа доазув водоохранни лоархӀаш да, цига капитальни гӀишло хьалъе могадаьдац законах», цудухьа 100 гектар цигара лаьтта парк хьалъяра эггара дикагӀа йола моттиг я. Из доацаш а, лаьтта федеральни наькъа юхе да, республикан ерригача моттигашкара цига хьатӀааха аттагӀа да. ГӀалгӀайче массехк парк мара яц, эггара йоккхагӀъяр а 26,5 гектар я, из МагӀалбикера Серго Орджоникидзе цӀерагӀа парк я, из Ӏойиллай 1954 шера. Цудухьа керда парк хьал ца йича яргйоацарех я. Куц-проектах салаӀара лаьрхӀа хоза моттиг хургья, эшаш мел дола хьалаш а хургда цунна чудоагӀаш. Къаман парка даькъ тӀа хургба Ӏам, футбола, кхыйола спортивни майдаш, удаш дола наькъаш, аттракционаш, лакхера деррига гойташ йола чарх, иштта кхы а дукха хоза моттигаш. Парка доазон тӀа массанахьа баьццара гаьнаш ягӀаргья, царна юкъегӀолла цхьацца скульпторий гӀонца хьадаь гӀовнаш латтаргда, кхыйола хозаленаш а хургья.
ГӀишлошъяра министерствос бахархой тӀахьех, кхадж тоссача дакъа лаца, цу лоархӀамеча гӀулакха юстара цалаттар.
