Келаматанаькъан Махьмуд-Ӏаьлас «Росси» яхача кхетаче дийцар, республике туризм дегӀаярах
Москве ВДНХ дӀахьош йолча «Росси» яхача гойтаме-кхетаче ГӀалгӀайчен Ди долаш, республикан кулгалхочо Келаматанаькъан Махьмуд-Ӏаьлас дийцар, ше РИА Новости интервью луш, мехка туризм дегӀайоалаяра йолча таронех, дӀахо де лерхӀарех. Цо белгалдир, мах луш дола туризма хьалаш дикагӀа хилийта дезар, хьаьший чуӀеш хургбола гостиницаш, иштта кхыдола туристашта лаьрхӀа хьалаш дикал лакха йолаш хила дезилга, туристаш дукхагӀа хила безилга, яхаш, хоам бу «Сердало» газетага ГӀалгӀайчен Кулгалхочун, Паччахьалкхен зарбан болх лелабераша.
Кулгалхочо ГӀалгӀайче туризм дегӀайоалаяра массехк оагӀув гойтар. «Сафмар» яхача дикача гӀулакхий ганзо лаьрхӀад, республике ӀТ-гостиница, иштта «Каьзи», «Аьрзен бӀы» яха гостиницаш хьалъе мехкарча лоаман даькъ тӀа. Иштта 2024 шера Барта ГӀала даькъ тӀа лостама балхаш дергда, цул совгӀа хьаелла лаьрхӀад Park Plaza центр 18 000 кв метр доазон тӀа хӀама йохкара-салоӀама йоккха центр.
«Туризм, хьаша тӀаэцара гӀулакх» яхача къаман проектах ЦӀай-Лоам туристически никъ тоабеш болх дӀабихьаб, дукъа доазон тӀа гостиница яра дола балхаш юкъе а доагӀаш. Керттерча проектах цаӀ я «Ӏарамхи» ВТРК дегӀайоалаяр, цунна чудоагӀа кхоъ хьалъэхка гӀандаш дола канатни никъ бар, Ӏомавалара бола лувжаш хехка наькъаш дар, искусственни лоа гулдара йола моттиг яр, апарт-отель хьалъяр, 14 000 кв метр йола кхо гостиница яр.
Из проект дӀаяхьара 13 млрд сом хьахьожаде лерхӀаш да, цу юкъе 700 балха моттиг хургья. ТӀехьарча диъ шера «Ӏарамхи» курорте ухараш 3,5 дукхагӀа хулаш латт. Цул совгӀа, регионе туризм дегӀайоалаяра, наькъаш шердара бола болх а дӀабихьаб, керда авиарейсаш хьайийллай, цӀермашиннаькъаш кердадаьхад. «Сафмар» ганзо ЖӀайрахьа кхале машенашца лелача туристашта лаьрхӀа 20 моттиг йола лагерь хьаяьй. Республикан гойтам болча хана, хьаьший таро хилар мехка туризман гӀишлош го.
Иштта цига дӀайихьар лоаман ГӀалгӀайчен онлайн-экскурси; таханардар гойташ йола технологи, сурташ, гӀалгӀай Ӏадатех лекцеш юкъе а йолаш.
