Мехкада: Дешара моттигаш кийча йий хьожаш ба мехка
Дешара шу долалуча дийнахьа, шоай наIараш хьаелла кийча хила езаш я мехкара 244 дешара моттиг. Цу юкъе я ишколаш, берий бешамаш, СПО моттигаш. Керда дешара шу дIадоладергдараш 85 эзар совгIа мехкахо ва, хIаьта 8,5 эзар гаргга дола бераш ишколан коа эггара хьалха хьачударгда.
«ЛоархIаме да, тов бетта ӏ-ча дийнахьа бераш лерттIа тоаяь латтача гIишлошка хьачудахкар. Укх шера, боккха болх дIахьош, тоаеш латт ялх дешара моттиг – ишкол, йиъ берий беш, колледж. Дешара шу долалуча дийнахьа кийча хургья уж моттигаш, шоай дешархой тIаэца. ДIахо йолча моттигашка а чоалхане доаца тоадараш деш, кулг тохаш, лостам баьб. Ишколерча автобусий гIулакхага а хьежад тхо хьалххе. 97 ишколашколера бераш, мах боацаш, дIакхувларгда, тахан болх беш яраш ӏ38 автобус я. Ишколерча автопарке керда автобусаш хилийтар керттерча гIулакхех да тахан.
Къаьстта терко еш ба дешара моттигашкарча кхерамзленца дувзаденнараш лертIа хилийтара. Берий, болх бечар кхера безаргбоацаш, боаггIача боараме тоадаь, терко еш хила деза деррига», - белгалдир вай мехкадас Келаматанаькъан Махьмуд-Ӏаьлас.
Берашта деша арадовла йисар цхьа кIира ха мара яц, цунга хьежжа хьинаре болх дIахьош, кийча хилийта деза деррига. Дешара шера хьалхара ди, тIехдика кийчо яь, дIадихьа хила деза массайолча моттигашка. Керттера декхар – хоза тоаяь латтача, сийрдача ишколашка, берий бешамашка, колледжашка дешархой хьачуэцар. Даьй, ноаной дог тийша хила беза, шоай берий кхерамзленца дувзаденнараш уж деша дагIача моттиге къаьстта чIоагIа тIахьожам беш, лорадеш хиларах.
