Келаматанаькъан Махьмуд-Ӏаьлас самбо Федерацеца бувзам лелабе барт баьб
Москве ВДНХ дӀахьош йолча «Росси» яхача гойтама-кхетаченна чудоагӀаш, ГӀалгӀайчен кулгалхочо келаматанаькъан Махьмуд-Ӏаьлас «Ерригроссе Самбо Федераци» яхача Россе юкъарча физкультурно-спортивни юкъарча цхьанкхетарца бувзам лелабе чӀоагӀо йир, яхаш, дийцар «Сердало» газетага мехка кулгалхочун зарбан болх лелабераша.
Ше тешаш ва, аьлар мехкадас, из барт барах мехка самбо дегӀаяра таро дикагӀа хургхиларах, дика толамаш доахаргхиларах.
«Ерригроссе Самбо Федерацеца бувзам лелабаро говзал дӀа-юха эца таро лургья, цхьана яхьаш дӀаяхьа, цхьана Iомабала йиш хургья, цул совгӀа, ГӀалгӀайче самбо наха юкъе дикагӀа йоаржае, вIашагIкхетараш дӀадахьа новкъостал де аьттув лургба», - аьлар мехка кулгалхочо.
Договора тӀа яь чӀоагӀо я, мехка самбо дегӀайоалаяра шоайла цхьана болх лелабе, физически культуран, спорта даькъ тӀа юкъара лоархӀам бола проекташ кхоачашъе, къаман унахцӀено чӀоагIъе, вахара нийса никъ кхолла.
